14 Oct 2026

Temo ke nngwe ya ditsela tse di ka godisang itsholelo ya lefatshe le go tshetsa setshaba. 

Ka jalo, thobo e e nametsang e ka bonala fela ka popagano, therisano le neelano. Se se builwe ke molemi e bile e le mogwebi, Rre Agisanyang Joseph, ka letsatsi la ipelelo thobo kwa motseng wa Thabala bosheng. Letsatsi leo le ne le tshwerwe ka fa tlase ga setlhogo se se reng: lentswe la molemi ke thobo.

Rre Joseph o ne a tlhalosa fa setlhogo se, se buisa tse di diragalang mo mererong ya temo. A lemotsha balemi fa go lema le go roba e se tsone fela tse di kayang fa motho e le molemi. A re go nna molemi go tlhoka motho yo o nyoretsweng thuto, a na le tirisano mmogo le go nna le boineelo le boitshoko. 

Rre Joseph a re temo e dikgwetlho dintsi tse di tlhokang gore molemi a bo a na le boitshoko. A re nako tse dingwe, molemi o ka lema nme e re a solofetse go roba, a fitlhele diji di ikabile ka dijalo. Se, a re se tlhoka gore molemi a se kgobege marapo mme a netefatse gore o roba sepe fela se se setseng morago ga tshenyo ya diji.

O ne a tswelela ka go tlhalosetsa balemi bo-mosola jwa go inaakanya le balemisi, go anywa thuto mo go bone le balemi ba bangwe, go dirisana le baitseanape go tlhabolola temo ya bone. Se, Rre Joseph o boletse fa se ka thusa go isa thobo kwa godimo le go tlhofofaletsa balemi tiro ya go lema.

O ne a rotloetsa balemi go tsenelela dipitso tse di ba amang, a ba gakolola gore diphetogo tse di nametsang, tswelelopele, ditshutiso le melao kgotsa mananeo a tsa temo di ka nna le boleng fela fa balemi ba ka kuka lentswe ba neelana megopolo le babusi, baitseanape le balemisi. O tlhalositse fa go dira jalo go ka tlhofofatsa dipatlisiso tse di ka arabang mathata a a apereng balemi.

Fa a tswa la gagwe, molemi yo o gaisitseng botlhe ba ba lemileng mmidi o o mosweu wa setswana, Mme Ditsietsi Oremeng (53) o ne a bolela fa temo e le botshelo mo go ene. 

A re o tsene mo temong ka maikaelelo a go itirela letseno, a tswelela ka gore e re le ntswa dikgwetlho tsa temo di le dintsi, boitshoko bo a busetsa. 

Mme Oremeng o boletse fa diji di tshwana le dipeba di kgona go tlhasela dijwalo, go boe go nne le pula e e ntsi thata e e bakang gore dijwalo di bole mme dikgwetlho tse tsotlhe di batla molemi a na le maikaelelo a go roba sengwe mo go se a se jwadileng. 

“Fa diemo di tla, re ikgolaganya le ba bolemisi le balemi ba bangwe mme re akantshane gore tharabololo ya mathata a a re apereng rotlhe e ka nna eng, re boe re itlame gore le fa go ka nna jang, mongwe le mongwe wa rona oa go roba sengwe” a tlhalosa.

O ne a rotloetsa balemi go inaakanya, go rekisa le go lema peo ya setswana e e ungwang e bile e kgona go emelana le dikgwetlho tsa tepoloapi tse di sa iketlang. O ne a tswelela ka go rotloetsa setshaba go lemela go rekisa, a gakolola fa lemme le sa latse ka tlala.

Fa a tswa la gagwe, Kgosi Abel Kgaboyarona wa Thabala o ne a leboga botlhe ba ba ileng go ipelela thobo, a re e re ntswa batho ba sa lekane, tiro e tshwana ya go lema le go roba e ama mongwe le mongwe. 

Kgosi o rotloeditse tirisano mmogo magareng ga balemi le balemisi, a gatelela gore temo ga se go lema dijalo fela, mme ke go kgona go re pheletsong o robe se o ka se rekisetsang setshaba go kgona go itshetsa. ENDS