Banni ba Metlobo kwa kgaolong ya Good Hope/Mmathethe ba kopile Tona wa ditsela Rre Keoagile Atamelang gore a netefatse gore tsela e e simolalang kwa Mmathethe go ya Werda e a dirwa. 

Ba boletse fa tsela eo e ba senyeditse dikoloi ba supa fa le dipalamo tsa setshaba di sa tlhole di le teng mo tseleng eo ntateng ya seemo sa yone. 

Ba buile jalo kwa phuthegong ya kgotla e e neng e buisiwa ke mopalamente wa kgaolo, Dr Edwin Dikoloti ka Mosupologo. 

Tona Atamelang o supile fa tsela eo ya boleele jwa 250km e setse e diretswe moalo. O boleletse morafe gore tsela eo e mo ditogamaanong tsa NDP 12.

O boleletse morafe gore tsela eo ke nngwe ya tse di tlaa dirwang mo nakong e e sa fediseng pelo ka jaana e golaganya balemi le mmaraka, ka jalo a ba kopa go nna pelo telele.

Mopalamente wa pele Rre Patrick Ralotsia o supile fa go utlwisa botlhoko gore abo ba lema mme e re morago ba palelwa ke go isa thobo mmarakeng.

Banni ba supile fa go ngomola pelo ka jaana tsela eo e kile gatwe madi a yone a teng mme jaanong mo nakong ya gompieno go sena nko e tswang lemina. 

Mokhanselara wa kgaolo Mme Lizzy Lekalabuswa le ene o supile fa tsela eo e tswa kgakala gotwe e tlaa dirwa mme le jaana ba ntse ba letile.

O ne a kopa gore bogolo go dirwe tsela fela e e ka felelang mo motseng fa go santse go emetswe go bona madi ka jaana 250km e le boleele jo bo tona.

Tona Atamelang o boleletse morafe gore puso e santse e batla methale e mengwe ya go e dira ka go dira tsela go le turu. A re ba tlaa leka le gone go bua le bagwebi gore gongwe mongwe o ka e ithaopela.

Banni ba kopile mopalamente wa kgaolo le tona ya ditsela gore bogolo ba ba fe nako ya gore tsela eo fa go padile e tlaa dirwa ngwaga ofe.

Mo go tse dingwe, ba kopile Tona Dikoloti gore a netefatse gore baruakgomo ba tsa bone di bolaiwang morago ga go tlola terata ya tlhako le molomo, ba sidilwe maikutlo ka jaana go bolaelwa leruo go se bonolo. Mopalamente Dikoloti o ne a abela banni dikobo di le lekgolo. BOKHUTLO