Modulasetilo wa komiti ya dikgafela, Rre Tshegofatso Mere, o supile fa dikgotla tsotlhe kwa Kanye di tlaa isa mabele kwa kgotleng kgolo, a rwelwe ke bomme ka ditlatlana. O tlhalositse fa mabele a mangwe a tlaa busediwa kwa dikgotleng, go ya go inelwa go dira momela o o tlaa dirisiwang go bedisa bojalwa jwa Setswana. 

E tla a re Lwetse a le malatsi a masome mabedi le botlhano, bomme ba rwale bojalwa ka dinkgwana go bo isa kgosing mme e re morago bo ye go nowa kwa dikgotleng ka go farologana, go leboga Ramasedi. Bomme ba tlaabo ba apere kapari ya ngwao ya Sengwaketse, borre ba tshwere dikala tsa setlhare sa moologa, go opelwa dikoma bo maphotshophotsho kana mogogoga. 

Maphotshophotsho ke koma e e supang gore pula e e namagadi e tlaa na, fa mogoga e le e e kopang pula kwa go Ramasedi. Dikgafela tsa bofelo go tshwarwa ke ka 2023. BOKHUTLO