23 Jul 2026

Mopalamente wa Kanye Bophirima Rre Victor Phologolo o rotloeditse banni ba Selokolela  go dirisa lenanaeo la  thuo ya dikoko le dihutshane.

 Rre  Phologolo o tlhalositse se, mo phuthego ya kgotla kwa motseng oo bosheng. A re se, se ka  thusa go fedisa manokonoko a letlhoko la ditiro a ba a  ba rotloetsa go ema ka dinao go dirisa lenaneo leo.

O tlhalositse fa thuso ya lenaneo le, e le kadimo ya madi go simolola ka P500, 00 go ya ko go P50 000,00 fa o eletsa go ruela mo lapeng. A re tsamaiso ya lone e dirwa ke lephata la CEDA.

O tsibositse banni gore mmaraka wa koko ya Setswana ke o o solofetsang fela thata e bile go lebega fa  Batswana ba ise ba kgone go o kaba.

Mopalamente o rotloeditse morafe gore  go dira kgwebo  go batla tlhaloganyo ya go tshepha fa kgato kgotsa mogopolo o tlaa ungwa gona le go akanya ka di tla morago pele.

A re lenaneo la Ikageng le diretswe go fokotsa letlhoko la ditiro ka jaana le kgaogana le mmereki a le mo seemong sa go ka ikemela go dira tiro ya diatla.

 Rre Phologolo a re morago ga ithutuntsho, badiri ba lenaneo la ipelegeng ba neelwa ditlankana go rurifatsa fa ba kgona go dira tiro.

Banni ba ne  ba supa fa ba amogela lenaneo leo la thuo ya dikoko, le fa ntswa bangwe bangwe ba lela ka letlhoko la lefatshe la temo thuo fa nako  ya go rua dihutshane  e goroga.

Ba ne wa kopa Mopalamente go re go sekasekiwe mebaraka ya thekiso ya ditswa thuong ya dikoko go tila tiego  e e ka tlogang ya baka tshenyego ya nama.

Mo go tse dingwe, monni wa Selokolela Rre Leatile Kenalemongwe o ne a itela ka go sa tsheleng sentle mo motseng fela ka o tswa kgolegelong.Rre Kenamongwe o ne a tlhalosa fa banni bangwe ba ba jesetsa mo kgobedung ka go ba kgoba ka dipuo, ka jalo a ikopa Mopalamemte gore a go ka se nne le komiti e e ka rulaganyetsang go amogelesega ga ba ba golotsweng kwa kgolegelong go tsena mo setshabeng.

Mo godimo ga se o kopile gore go nne le letlole le le ka thusang go ba ema nokeng mo go simololeng  go tshela mo setshabeng, ka jaana a re  ba gololwa go sena se ba ka  ithusang ka sone mme letlhoko la bone le le legolo thata.

A re  go nne le letlole le le ka thusang mo go ba simolodiseng dikgwebo tsa go dira ka diatla ka jaana ba tla ba rutuntshitswe kwa kgolegelong.

E rile a tswa la gagwe , Kgosi koorapetse Legabala  a kua mokgosi go kopela morafe  wa gagwe  thuto-seka-dipusianyo le dithuto mabapi le dikgang tsa kgokgontsho le dipolaano tsa marato tse di tshwenyang mo motseng wa Selokolela.

O ne a itela mo go botlhe ba ba ka thusang go tsisa thuto go ba tswa thuso. BOKHUTLO