25 Jun 2026

Kgaolo ya Tsabong e tsweletse ka go itemogela koketsego ya dipalo tsa bogodu jwa leruo ga mmogo le go tlhoka go obamela melao ya go lwantsha kanamo ya bolwetse jwa tlhako le molomo mo kgaolong.

Seo, se rurufaditswe ke motshwarelela mookamela mapodise a Tsabong, Assistant Superintendent Johnson Gaolaolwe mo potsolosong a tlhalosa fa bontsi jwa dikgang tsa bogodu e le tsa dihutshane.

Rre Gaolaolwe o tlhalositse fa e e rile mo kgwedi ya Motsheganong e le masome a mabedi le boferabongwe, ba gatisa molato wa leruo le le utswilweng le akaretsa dipodi di le boferabongwe. Tiragalo eo, o tlhalositse fa e diragaletse kwa merakeng gaufi le McCarthy’s Rust, motse o o gaufi le molelwane wa South Africa.

A re mo palong e e utswilweng, dipodi tse tlhano di ne tsa bonala kwa South Africa, fa di le nne mapodisi ba di fitlhetse kwa McCarthy’s Rust.

Rre Gaolaolwe o tlhalositse fa babelaelwa mo molatong oo e le makawana a dingwaga tse di lesome le botlhano le masome a mabedi le bone botlhe ba McCarthy’s Rust. A re ba belaelwa ba santse ba emetse go iponagatsa fa pele ga le lekgotla la ditsheko la ga mmakaseterata kwa Tsabong. Mo molatong o mongwe, Rre Gaolaolwe o tlhalositse fa ba tshwere mmelaelwa mongwe wa dingwaga tse di masome a mararo mabapi le go utswa a bo a tlhaba podi kgwedi eno e le lesome le boraro.

Motshwarela mookamela mapodidisi a Tsabong a re  monna yo o tlholegang mo kgotleng ya Bogosing kwa Tsabong, o emetse go iponatsa fa pele ga lekgotla la ga mmakaseterata go arabela molato wa bogodu jwa leruo. Rre Gaolaolwe a re mapodisi a ne a bona borre ba babedi ba dingwaga tse di masome a mane le bobedi le masome a matlhano le boraro ba kgotla ya Legonono mo Tsabong, melato mabapi le go bolaya diruiwa.

A re mongwe wa bobedi joo, o ne a tshwerwe mabapi le go bolaya tonki, mme a sena teseletso go supa theko ya seruiwa seo. 

A re yo mongwe e ne o ne a lebanwe ke molato wa go bolaya nku, mme a bonwa molato wa go tlola melao e e tlhomilweng go thibela kanamo ya bolwetsi jwa tlhako le molomo, e e thibelang go tlhabiwa ga leruo le le tlhako e maphata. Are borre ka bobedi ba ne atlholwa madi a kana ka makgolo a le matlhano a dipula mongwe le mongwe wa bone, a supa fa tiragalo e e diragetse kwa merakeng ya Tswai gaufi le Tsabong.

A re mo bogaufing, ba ne ba begelwa molato go tswa South Africa, go tlhalosiwa fa monnga polasi nngwe a supile fa a utswetswe diphologolo di akaretsa mebutla le diphuti. A re e ne ya re go latedisa motlhala wa diphologolo tseo, ba sepodisi ba di fiitlhela kwa McCarthy’s Rust kwa ba neng ba tshwara babelaelwa ba le babedi e leng borre ba dingwaga tse di masome a mabedi le bofera-bongwe le masome a mane le borataro.

Rre Gaolaolwe o supile fa ditlhotlhomiso di supile fa bobedi joo, bo tlodile terata e e kgaoganyang Botswana le South Africa, e se ka fa molaong. Mo go tshwarweng ga bone go tlhalosiwa fa go fitlhetswe dinama tsa diphuti tse pedi. 

O boletse fa bobedi joo, bo atlhotswe madi a kanang  ka makgolo a le matlhano a dipula mongwe le mongwe wa bone mme ba sa ntse ba le mo diatleng tsa mapodisi a South Africa go ba thusa mo ditlhotlhomisong mabapi le go tsena mo lefatsheng leo e seng ka fa molaong.

Superintendent Gaolaolwe a re fa e sale go tlhagoga bolwetse jwa tlhako le molomo, ba setse ba gatisitse dipalo tsa batho ba ba tshwaretsweng go tlhoka go sala melao ya go emisa kanamo ya bolwetsi joo, e le metlhano, fa ba ba tlhokileng dipampiri tsa theko ya leruo di le tharo.

Mme a re mapodisi ba tsweletse ka go tshwaragana le go dirisana le ba sesole le Special Support Group go nonotsha go disa molelwane wa Botswana le South Africa gammogo le go netefatsa fa setshaba se sala morago melao ee tlhomilweng go lwantsha kamano ya bolwetse jwa tlhako le molomo.

O kgothatsaditse botlhokwa jwa go sala ditaelo morago gammogo le bopelotetele mo setshabeng a tlhalosa fa go ka boloka lefatshe. BOkhutlo