22 Jun 2026

Banni ba Lobatse ba lela ka borukutlhi jo bo kekelang jwa megala ya kopore mo toropong eo. 

Banni ba roletse mopalamente wa Lobatse Rre Kamal Jacobs matshwenyego a bone kwa kgotleng bosheng ba supa fa seeemo seo se ba baya ka fa mosing ka ba tshelela mo lefifing. Modulasetilo wa dikomiti tsa ditlhabololo tsa Peleng, Rre Andrew Maokaneng a re ba tshwenngwa segolo bogolo ke dipone tsa mebila tse di sa berekeng ka mabaka a gore borokutlhi joo bo ile magoletsa. O kopile gore mafelo a go rekisiwang dithoto tse di latlhilweng a tlosiwe mo toropong ka a rotloetsa borukutlhi.  

Mo go tse dingwe, o kopile gore go agiwe mafaratlhatlha a kgopho ya metsi a a leswe go ralala Lobatse ka madi a a abelwang kgaolo ya botlhophi ya Lobatse mo ngwageng ono, mme madi a a tlaa salang a kopa gore a dirisiwe go baakanya tsela.

Rre Maokaneng a re ba tshwentswe thata ke matlotla mo toropong eo a a akaretsang kwa malwapeng, dikgwebo le mafelo a magologolo a puso, a a sa tlhabololweng. Ka jalo a kopa gore seo se emelwe ka dinao go tokafatsa selebego sa toropo.  

Modulasetilo wa dikomiti tsa ditlhabololo tsa Woodhall, Rre Samuel Makgau ene o rile beng ba matlo a a firisitsweng, ba tshwanetse ba tlamiwa go tlhabolola matlo a bone go itsa gore a seka a nna matlotla. 

Kgosi Tebogo Kemoabe wa Peleng le ene o supile fa a tshwentswe ke matlotla mo Lobatse, a supa gore bontsi jwa ditsha tsa bonno ga di tlhabololwe. O tlhalositse gore bontsi jwa banni ba toropo ke bahirisi mme dijarata ga di tlhabololwe ka jaana beng ba mafelo ao ba ile magaeng, ka jalo a kopa gore go dirwe sengwe ka seo go tokafatsa selebego sa toropo. 

Kgosi Kemoabe o tlhalositse fa ba sa jesiwe diwelang ke barekisi ba mo mebileng ba ba rekisang motsokwe wa lengwanda,  mme thekiso e tsere phekelo e sele ka jaanong e ama bana ba ba rongwang go o reka ke batsadi bangwe. Kgosi o tlhalositse jalo gore ngwana o kgona go o reka a o itirisetsa a sa rongwa mme seo se ame botsogo jwa gagwe. 

Kgosi Kemoabe o ntshitse gape ngongora ka dimausu tse dintsi tse di butsweng gaufi le dikgoro tsa dikole, a supa fa dimausu tseo di le borai ka di rekisa dingwe tse di sa letlelelweng tse e leng gore fa ba dira dipatlisiso tsa dikgetsi dingwe tse di gorogang mo makgotleng a setswana ba fitlhela dimausu tseo di amega. O gakolotse batsadi go fokotsa go neela bana mad mme ba ba direle mopako ka jaana go neela ngwana madi letsatsi le letsatsi go ka baka mekgwa e e sa letlelesegeng, jaaka wa borukutlhi le gone gore bana ba ka raelesege go reka dingwe tse di sa letlelelweng.

Kgosi Kemoabe a re e re ntswa dimausu tseo di thusa batsadi go itshetsa, dingwe tsa tsone di baka dikgang tse di felelang di goroga kwa makgotleng a setswana ka bangwe ba rekisetsa bana ditagi koo. O kopile gore dimausu tseo di fokodiwe mme e bile di tsenngwe leitlho le le tseneletseng go babalela bana. 

O tsweletse a bolela fa kgokgontsho ya bong e ba tshwenya ka ba tsweletse ka go amogela dikgetsi tsa mofuta oo mo makgotleng. A re bomme bangwe ba ithusa seemo sa kwelotlase ya itsholelo ka go atumela borre ba ba berekang.

 “Mme yoo ka ga a bereke o nna motlhanka mo go rre, yo e leng gore fa a batla go mmetsa wa mmetsa, fa a batla go mo koba wa mo koba mme ka gore mme yo ga gona kwa a ka sielang teng, o a itshoka,” kgosi a bolela. O ne a gakolola borre go emisa kgokgontsho ya bong ka seemo seo se tlhobaetsa. 

Kgosi Kemoabe o ne a tlatsa a gore ba tshwenngwa ke marekisetso a nnotagi a a rekisang khadi le chibuku. E re le fa beng ba mafelo ao ba a dirisa go itshetsa le go tsenya bana dikolo, kgosi a re go na le tse di fatlhang tse di diragalang koo. O ne a kopa gore mafelo ao a fokodiwe mme go dirwe sengwe se sele sa itloso bodutu. 

O boletese fa mafelo ao a kgoreletsa thuto, ka jaana bana ba sa kgone go bala sentle kwa malwapeng, a gatelela fa seemo seo se tshwanetse sa emelwa ka dinao go babalela isago ya bana. BOkhutlo