Mopalamente wa Shoshong, Rre Moneedi Bagaisamang, o lebogile le go akgola baithaopi ba ba baakanyang terata ya mafudiso e e kgaonyang kgaolo ya legare le dikgaolo tsa Kgatleng le Kweneng.

A re go botlhokwa go ikemele ka dinao go lwantsha kanamo ya mogare wa tlhako le molomo.

Rre Bagaisamang yo a neng a bua kwa phuthegong ya kgotla kwa Otse ka Labone a re baithaopi ba supile  mowa wa boipelego le boikarabelo, ka jalo ba tshwanetse go  rotloediwa. 

O kgothaditse setshaba go sala ditaelo tsa lephata la temo-thuo morago, go hema bolwetse.

Fa a itebaganya le seemo se se sa itumediseng sa dikole le dikokelwana, a re puso e tsere tshwetso ya go tlhoma khamphani ya puso e e tlaa di baakanyang.

Rre Bagaisamang o supile fa a tshwenngwa ke batsadi ba ba ikgatholosang bana a re, molao o teng o o sireletsang bana mme ba ba dirang jalo ba tlaa salwa morago.

Mopalamente o tsibositse banni ka tshenyetso setshaba, a re ba botlhe ba ba  ka amegang mo tshenyetso setshaba ba tlaa tseelwa dikgato go ya jaaka molao o tlhalosa.

Mo gotse dingwe ,Rre Bagaisamang o rotloeditse banni ba Otse go tsosolosa dikoporase gammogo Ie go lema letlhare la moringa gore ba gwebo ka one.

Fa a akgela, modulasitilo wa komiti ya ditlhabolo tsa motse, Mme Kago Selebatso o lebogetse puso ka lenaneo la Ikageng le kago ya kokelwane e tsweletseng.

Mme Selebatso o ne a supa ngongora ka tlhaelo ya metsi le motlakase ka ntlha ya go gola ga motseng le letlhoko la ditiro segolo jang mo bananeng mme a kopa gore ba agelwe lefelo la itloso bodutu. BOKHUTLO