03 Jun 2026

Kgosi Raphael Mmipi wa Metsimotlhabe o sa tswa go tlogela tiro ka bogodi a le dingwaga di le masome a robabobedi.

Kgosi Mmipi o sale a etelela morafe wa Balete le baagedi ba Metsimotlhabe go simolola ka ngwaga wa 1988 go fitlha monongwaga.

Mmipi o kailwe ke dibui ka go farologana ka poifo Modimo, boineelo, bokgeleke jwa go rarabolola dikgang a sa tsee letlhakore le go nna kutlwelobotlhoko.

Fa a laela Kgosi Mmipi, ka Labotlhano, kgosi wa Bakwena Kgari Sehcele III a re o ne a direla morafe tekatekanyo a sa lebelela gore motho ke wa maemo afe mo setshabeng.

“Maemo a bogosi a ne a mo fitlhela a ntse a le mo tirong. Ga a ise a kope ope gore a mo tlhatlose maemo ka gore o dira tiro. O ne a dira tiro ya bogosi ka boineelo a itse gore ke tiro ya boithapo le gore o direla morafe wa,” ga bua Kgosi Kgari.

A re go bo morafe o bone gole maleba gore ba thulanye ditlhogo ba mo direle moletlogadi wa tsamaya sentle ke bopaki jwa gore o berekile le bone go sena makgwere ape.

Kgosi Kgari a re le fa ntswa a fitlhetse Kgosi Mmipi mo bogosing o berekile le ene ka lebaka mme ga gona letsatsi lepe le a kileng a seke a bereka sentle le ene. 

A re Kgosi Mmipi o tsene mo tirong ya bogosi a santse a nonofile mme a dirisa nonofo eo le botlhale go direla morafe, ke jaaka a tlogela tiro eo ka mabaka a gore o godile, o feletswe ke maatla.

“Ke itumelela tirisanyo mmogo kgosi, mme ke eletsa thata gore le mo go itapoloseng ga gago, Modimo a nne a go segofatse, a go okeletse malatsi, e re fa mabaka a patika re tle fa go wena, re ngunangune le wena o nne o re gakolole o re tlhatlhelele,” ga bua Kgosi Kgari.

E rile a itebaganya le Kgosi Kgosi Ronald Mmipi, yo neng a tlhongwa kgosi, Kgosi Kgari o ne mo gakolola gore a ikanye motsadi wa gagwe, go tsaya bogakolodi, fa marara a raraane.

Mo mafokong a gagwe a go laela morafe, Kgosi Mmipi o kaile fa tiro ya bogosi ele ya mautlwelobotlhoko ka jalo fa motho a e bereka o tshwanetse gore a e bereke a eteleditse mautlwelobotlhoko kwa pele.

Are o kgonne ka go ikanya thapelo, ka jalo a rotloetsa motlhatlhami wa gagwe, marara ka go farologana go dira ba ikantse Modimo ka dinako tsotlhe.

“Bagaetsho a re berekeng re tshwaragane thata, re tla kgona. Gatwe kgetsi ya tsie e kgonwa ke go tshwaraganelwa. Sengwe le sengwe fa re se dira ka popagano e kgolo kana re a bo re se direla gore Modimo a re thuse,” Kgosi Mmipi a laela.

Kgosi Lawrence Thobega wa Mmankgodi a re Kgosi Mmipi o tsamaya le ene a mo tlhatlheletse maele a bogosi gore a kgone go etelela morafe.

Kgosi Thobega a re morafe wa Metsimotlhabe o letlhogonolo go etelelwa ke Kgosi Mmipi, a reetsa le bone ba mo utlwa.

A re mo bogompienong bogosi bo ratiwa ke mongwe le mongwe. BOKHUTLO