28 May 2026

Bagwebi ba ba botlana kwa toropong ya Selebi Phikwe ba akgoletswe go tswelela ba dira ka gotlhe mo go tswakanyeng itsholelo ya toropo eo ka ditsela tse di farolganeng e bile di nametsa.

Kgosi Molefi Pilane wa kgotla ya Ikageleng akgotse bagwebi bao mo thuto seka dipuisano e e neng e rulagantswe ke lekalana la Seed of Change.

Maikaelelo a thuto seka dipuisano tseo e ne ele go fa bagwebi ba ba potlana maele a go tswelela ba godisa dikgwebo tsa bone le fa ba lebangwe ke dikgwetlho ka go farolgana.

Kgosi Pilane a re fa e sale moepo wa BCL o tswalwa, o e eng e le one konokono ya itsholelo mo toropong eo, bagwebi ka go farologana ba ne ba tswelela ba dira ka gotlhe le ntswa dingwe dikgwetlho di ne di gomagometsa go phutlhamisa dikgwebo ka go farologana.

A re se bagwebi bao ba neng ba tswelela ba se dira, go tshegetsa dikgwebo tsa bone, go supile fa ba ikiteile sehuba e bile ba itse mabaka a gore ke eng ba ne ba tsena mo dikgwebong tseo.

Kgosi Pilane o akgotse maiteko ao a tlhalosa fa dikgwebo tseo di dira seabe se se bonalang go tsweledisa go tswakanya itsholelo.

Kgosi Pilane o tsweletse ka go kgothatsa bagwebi bao go tswelela ba tia moko ka tse ba di dirang, go tsaya maele le dikgakolo mo makalaneng a dikgwebo ka go farologana, a re lerato mo go tse ba di dirang ke sengwe se se ka ba thusang go itshetlela le fa dikgwetlho di ka tlhagoga.

O bile gape a akgola bagwebi ba, a re ntle le go thusa go godisa le go tswakanya itsholelo ya toropo ya Selebi Phikwe, malapa a le mantsi a tsweletse ka go tshela ka tsone dipoelo tsa dikgwebo tseo.

Fa a tswa la gagwe, Ratoropo wa Selebi Phikwe, Rre Oageng Makgosa, a re bagwebi ba ba botlana ke bangwe ba ba tsayang seabe se se bonalang mo go tswakanyeng le go aga itsholelo ya lefatshe leno.

Rre Makgosa a re e re ntswa dikgwebo ka go farologana di lebangwe ke kgwetlho ka go farologana, bagwebi ba seka ba lapa dipelo, mme ba tswelele ba batla maele a a tsamaelanang le diphetogo tsa sesha, a a ka thusang go godisa dikgwebo le go itepapatepanya le dinako tsa sesha. BOKHUTLO