27 Apr 2026

Bolwetsi jwa tlhako le molomo bo digile boleng jwa thekiso ya kgomo ka jaana tlhotlhwa ya kgomo e wela tlase segolo jang kwa mafelong a a amegileng.

Se se boletswe ke Dr Kennedy Ndlovu wa lephata la matlhoko a leruo mo phuthegong ya kgotla kwa Lerolwane mo kgaolong ya Kanye Botlhaba.

Dr Ndlovu a re fa kgomo e ka amana le molemo wa tlhako le molomo, tlhotlhwa ya theko e wela tlase. O kaile fa kgomo e ntse e rekwa P5 000 go ya kwa go P10 000, go ya ka letsopa la kgomo.

 A re kgomo fa e kentilwe e tlaa rekwa ka tlhotlhwa e e rekang kgomo kwa dikgaolong tsa Nhabe, kwa tlhako le molomo e neng ya tlhasela teng, e eleng sekete le makgolo a ferabobedi a dipula, a tlhalosa a bo a supa gore se se digela tlhotlhwa ya kgomo kwa go ya dihutshane.

A re go tlhagoga ga bolwetsi jo kwa kgaolong ya borwa go dubile mebaraka ya thekiso ya nama ya Botswana kwa mafatsheng a Europe. Dr Ndlovu o kaile fa seemo sa mebaraka se ka bifela pele fa bolwetsi bo ka amana le matlhabelo a BMC, ka go ka oketsa go kganelwa kwa ntle ga mmaraka wa Europe.

Dr Ndlovu a re go kgotsofatsa mmaraka o ke gore nama e seka ya amana ka gope le bolwetsi kgotsa mokento wa tlhako le molomo. A re le fa Zone 11 e tshwailwe ka gore e amilwe ke bolwetsi, kgaolo ya Kanye e santse e sena jone.

O ntshitse matshwenyego a gore dikgomo tsa metse ya Molapowabojang, Digawana, Mogojogojo le Lorwana di fulela ntlheng ya polase ya Hildavale, kwa go nang le bolwetsi teng.

A re se, se baya kgaolo ka fa mosing mme a kopa barui go dirisanya le puso le go tsaya boikaraelo jwa go tlhokomela loruo, a kopa morafe go disa, go tshuba ka tshipi ya kgaolo le go rwesa manyena.

Gape a re fa kgomo e ka timelela kwa go kentelwang bolwetsi e tshwailwe sentle, go ka thusa go lemoga fa e na le mogare le gore mong wa yone o ka e bilediwa fa bolwetsi bo sena go boela morago. BOKHUTLO