27 Apr 2026

Banni ba Motshegaletau kwa kgaolong ya Legare ba re ditsela tse di sa siamang, go tlhoka go ntshafadiwa ga dikago le matlo a bodiredi jwa puso le tiego ya ditsha tsa bonno, di ba beile ka fa mosing.

Kgosi Mogotsi Mosweu o boletse fa motse wa gagwe o faraferwe ke mathata, a kaya fa go tlhoka go bewa ditsha ka nako go kokonetse morafe wa gagwe mo ebileng bangwe ba setse ba ikantse go nna bo maipaafela.

O tlhalositse mo phuthegong ya kgotla, e e neng e biditswe ke mopalamente wa Serowe borwa kwa motseng oo, Rre Leepetswe Lesedi, fa se, se bakilwe ke tiego ya ba lephata la kabo ditsha.

Kgosi Mosweu o supile fa tsela nngwe mo motseng, e e neng e adilwe ditena, e le makgasa morago ga gore ba koporase ya metsi ba e kgankgamolole ka ba ne ba lemogile fa ditena di adilwe fa godimo ga moalo wa bone wa kgopo ya metsi.

Modulasetilo wa komiti ya ditlhabololo tsa motse, Rre Ogomoditse Ramphile, o supile fa dikago tsa ga goromente tse di mo motseng, di tlhoka go tlhabololwa.

 “Sekole sa rona se se botlana se tlhaela ditilo le ditafole, matlwana a boitiketso mangwe ga a bereke mo a bakileng gore sekole sotlhe se lebagane le matlwana a ka tshwara bobedi go dirisiwa. Se betsho, ga se selo se se siameng,” Rre Ramphile a tlhalosa.

A re dipilisi tsa bolwetsi jwa madi a matona le tsa bolwetsi jwa sukiri di a tlhaela mo motseng.

O kgadile batsadi ba ba tlogelang bana ba le nosi mo malwapeng, a re se ke go tlhoka tlhokomelo e e lolameng mo baneng, ebile go ba tsenya mo diphatseng tsa dilalome le dikotsi di tshwana le go shela mo matlong.

 “Mokgwa wa go phuaganya bana motsadi a ya bojalweng kgotsa a ya go bapala phane a o eme, le tsenya bana mo kotsing ya dilalome lego itshubela mo matlong ba re ba a ikapeela. A ko le nneng le tlhokomelo le lorato mo baneng,” Rre Ramphile a kgalema.

Mopalamente Lesedi, o ne a kgala se se dirilweng ke koporase ya metsi, a kopa gore ditshwetso tsotlhe tse di tsewang di nne le morero, go itsa go gotlhagotlhana. 

O gwetlhile maphata go tlhatlosa lebelo la go baakanya tse di senyegileng ka di sa siamela matshelo a setshaba.

A re jaaka puso e supile fa e sena madi, o kopa morafe go ipelega. 

O kopile thata gore morafe o tshwaragane le puso go lwantsha tlhako le molomo ka go sala morago ditaelo tse di beilweng ke ba lephata la tsa temo thuo.

Go dira jalo a re go ka babalela bonyenyane jwa leruo le ba nang le lone, le kamoso le ka tsogang le ba namola mo manokonokong a kwelo tlase ya itsholelo. BOKHUTLO