21 Apr 2026

Kgosi ya GaMalete, Kgosi Mosadi o rotloeditse morafe go netefatsa gore ba lwantsha tlhako le.molomo.

Mo phuthegong ya kgotla e neng e buisiwa ke motshwarelela Tona wa Lefatshe le Temothuo, Dr Edwin Dikoloti kwa Ramotswa ka Labobedi,

o tlhalositse fa lefatshe la Botswana le le mo mathateng morago ga gore le welwe ke seru sa bolwetse jwa tlhako le molomo. 

A re puso e ntse e mekamekane le dikgwetlho morago ga gore theko ya diteemane e le kwa tlase.

Kgosi Mosadi a re dintwa tse ditsweletseng kwa mafatsheng di kokonetse itsholelo le go feta ka jaana dithwatlhwa tsa leokwane di gakaditse seemo.

Ka jalo o ne a ba kopa gore ba seka ba kgala puso, mme ba e thuse mo mathateng a kana kana a.

Kgosi Mosadi o kopile dikomiti tsa temothuo mo motseng go netefatsa gore di bereka le marara ka jaana bolwetse jo bo tla ka methale e mentsi, bangwe ba bo tlisa ka go tlola terata, ba sa tlole kwa molelwaneng.

A re go netefadiwe gore gangwe le gape go tlhokomelwa kwa go nang le kgonagalo ya gore batho ba tlolele teng e le maiteko a go itsa kanayo ya bolwetse.

Mo go tse dingwe, o kopile Tona Dikoloti go buisanya le balekane ba gagwe kwa South Africa gore Balete ba letlelelwe go tsosa terata e kgaoganyang mafatshe a mabedi.

Morago ga gore bolwetse bo tlhage mo kgaolong e e tlwaelegileng ka Zone 11, Tona Dikoloti o sianye le kgaolo eo go lekodisana Batswana ka seemo se.

Fa a ba ema ka molaetsa, Dr Dikoloti o ba kopile gore ba ba nang le pelaelo ya bolwetse kwa masakeng a bone, ba seke ba sia ka bolwetse, mme ba itlhagise ba matlhoko a leruo.

A re o swabisitswe ke gore go na le barui bangwe ba go supafalang ba ntse ba beile bolwetse botsetse, ka jaana dikgomo dingwe di fitlhelwa di na le dipadi tsa bolwetse. BOKHUTLO