01 Apr 2026

Kgosi Moitshepi Molelwa wa motse wa Gumare o gwetlhile badirisi ba tsela go obamela melawana ya tsela le go kgweetsa ka keletlhoko go hema dikotsi.

A re bakgweetsi ba netefatse gore dikoloi di itekanetse le gore ba pege palo ya bapagami e e letlelesegang, a supa fa go ikaega ka thapelo go le gosi go sa lekana.

Kgosi Molelwa o buile se kwa merapelong e e neng o rulagantswe ke komiti ya ipabalelo tseleng ya kgao ya Gumare ka Labobedi go rape kgatlhanong le dikotsi tsa tsela ka malatsi a boikhutso a paseka.

Mookamela-sepodisi sa Gumare Superintendent Chenamo Orateng o gwetlhile bakgweetsi go nna kelotlhoko ka go bo ditsela tsa kgaolo ya Okavango di sa teratelelwa ka jalo leruo le ka baka dikotsi mo tseleng, a tlatsa ka gore ba-tsamaya-ka-dinao le bone ba tsamaye ka fa lebogong le le tshwanetseng gore ba bone dikoloi sentle.

Supt Orateng o supile fa mo ngwageng o o fetileng ba sepodisi ba gatisitse dintsho tse tharo tse di bakilweng ke dikotsi tsa tsela tse di masisi di le nne le dikgobalo tse di masisi di le nne mo kgaolwaneng ya Gumare.

Ka jalo o ne a re go botlhokwa go rapela kgatlhanong le dikotsi tsa tsela ka di gapa matshelo a batlhokomedi ba malwapa ebile di tlogela bangwe ba nale bogole jo bogolo jaaka go latlhegelwa ke dikarolo tsa mmele jaaka maoto le matsogo.

Modulasetilo wa komiti eo ya ipabalelo tseleng Rre David Moeng a re ba bonye go tshwanela go rulaganya thapelo eo e e akaretsang ba-nale-seabe botlhe.

A re dipalo tsa badirisi ba tsela di oketsega fela thata ka malatsi a boikhutso mme a re go botlhokwa gore badirisi ba tsela ba rulaganye mesepele go sa le gale le go tsamaya ba ikhutsa fa ba nale letsapa go tila dikotsi tsa tsela. BOKHUTLO