30 Mar 2026

Mogolwane wa tsa bogakolodi le tsa tumelo wa sepodisi sa Botswana Superintendent Mpoloka Maseko o kopile bomme go emana nokeng.

Fa a bua kwa pitsong ya bomme kwa Kodibeleng ka Labone, o supile fa go tshwenya go bona bomme ba sa batle go bona bomme ba bangwe ba atlega mo botshelong.

A re go bo bomme ka bontsi ba amilwe ke kgokgontsho ke sengwe se se ka bong se dira gore bomme ba tshwaragane le go dira mmogo gore ba fitlhelele ditoro tsa bone.

O boletse fa go ikemela ka dinao le go tshwaraganela go fenya khumanego go ka ba thusa go falola kgokgontsho, e a boletseng fa bontsi jwa nako, e bakwa ke go ikaega phetelela ka borre.

Supritendent Maseko o kaile gore le fa bomme ba amilwe ke kgokgontsho ka dipalo tse di kwa godimo, borre le bone ba tsweletse ka go amega. 

O ikuetse mo go bomme go emisa kgokgontsho mo go borre, a supa fa go se motho ope yo o tshwanetseng go tshelela ka fa tlase ga kgokgontsho.

Mopalamente wa kgaolo ya Shoshong Rre Moneedi Bagaisamang o ne  a re dikgang tsa kgokgontsho tse di diragalang kwa kgaolong ya Shoshong bogolo jang tsa dipolao di tshwenya.

O lebogetse sepodisi kwa Shoshong tiro e ntle e ba e dirang go lwantsha kgokgontsho, a tlatsa ka gore puso e eme ka dinao go lwantsha mamba yoo.

Rre Bagaisamang o kopile bomme le borre go dibela bana mo kgokgontshong, a tlhalosa fa go fapaana ka mafoko fa pele ga bana e le go ba kgokgontsha maikutlo.

Kgosi wa Kodibeleng Kgosi Gofaone Khukhwane o tlhalositse fa tiro eo maikaelelo a yone e le go fa bomme sebaka sa go itshekatsheka, go amogana maele le go arogana maitemogelo ka dikgang tsa kgokgontsho.

A re batshwentswe ke ditiragalo tsa kgokgontsho tse di diragalelang bomme le bana ba basetsana. O boletse fa maikaelelo a mongwe ele go nonotsha bomme gore ba ikemele.

Mogolwane wa sepodisi wa lekalana la tshireletso ya bana wa kgaolo ya Shoshong Sergeant Elizabeth Rammidi a re ba tshwenngwa ke dikgang tsa dipetelelo le tiriso botlhaswa ya bana mo go tsa tlhakanelo dikobo. BOKHUTLO