24 Mar 2026

Lephata la taolo matlhoko a leruo le tsweletse ka go loga maano a go kganela bolwetse jwa tlhako le molomo go tsenelela mo kgaolong e bophara ya Zone 11.

Morago ga go tswa ka metlhale ya go gagamatsa itshireletso mo molelwaneng gore bolwetse jwa tlhako le molomo jo bo tlhagogileng kwa South Africa bo seka jwa tsena mo Botswana, go simolodisitswe ditherisasanyo mabapi le kgaoganya kgaolo ya taolo matlhoko a leruo ya Zone 11 ka dikarolo go laola kanamo ya malwetse a leruo.

Fa a rerisa baeteledipele jwa Lobatse, motshwarelela moeteledipele wa lephata la taolo matlhoko a leruo, Dr Kobedi Segale o tlhalositse gore lefatshe leno le tswa kgakala le laola kanamo ya bolwetse jwa tlhako le molomo le malwetse a mangwe a leruo ka go dirisa melelwane ya taolo matlhoko a leruo.

Ka jalo, a re mogopolo wa go kgaoganya kgaolo ya Zone 11 ka dikarolo, ke tsela nngwe ya go laola kanamo ya bolwetse mme seo e le go tlaleletsa mo maitekong a puso a a tsweletseng a akaretsa go tshwaragana le barui le gone go tsosa terata ya molelwane.

O supile gore kgaolo ya Zone 11 e bophara, ka e tsaya sephato sa lefatshe la Botswana se se akaretsang kgaolo tsa Kweneng, Gamalete, Borolong, Kgatleng, Ngwaketse, Kgalagadi le Ghanzi, ka jalo e tlhoka go kgaoganngwa. A re bontsi jwa barui mo Botswana ba fudisa mo mafulong a a tlhakanetsweng ka selekanyo sa 80 per cent fa ba palo e e potlana ya 20 per cent e le ba ba ruetseng mo dipolaseng.

Dr Segale a supile gore se se raya gore fa bolwetse bo ka tlhagoga mo mafulong a a tlhakanetsweng a Zone 11, bo ka anama ka lobelo le le kwa godimo mme go seke go nne bonolo go bo laola, ka jalo go botlhokwa go kgaoganya kgaolo e ka dikarolo.

A re bolwetse jwa tlhako le molomo bo tlhagogile kwa South Africa ngogola mme bo setse bo amile dikgaolo tsa lefatshe leo tsotlhe, ka jalo seo se baya Botswana mo boraing bogolo jang kwa dikgaolong tsa thuo tsa Zone 7, 9, 10, 11 le 13 tse di mo molelwaneng wa lefatshe leno le la Afrika Borwa.

Dr Segale o tlhagisitse gore kgaolo ya Zone 11 ke nngwe ya tse di iseng di amiwe ke bolwetse jwa tlhako le molmo gotlhelele, ka jalo e rekisa nama kwa mmarakeng o nonneng wa Europe. Ka jalo a re fa bolwetsi bo ka tlhagoga mo mafelong a, go ka tsisa selelo le khuranyo ya meno ka go ama letseno la itsholelo ya lefatshe ka bokete.

Dr Segale, a re le fa ba dira maiteko a go laola malwetse a leruo, ba tshwenngwa ke tshenyo e dirwang ke batho mo diterateng tsa taolo matlhoko a leruo, ka jalo a gakolotse Batswana go emisa tshenyo eo. A re seemo sa bolwetse kwa South Africa se tsweletse ka go bifela pele ka jalo barui ba tshwanetse ba ema ka dinao go tlhokomela leruo lwa bone.

A re itsholelo ya lefatshe leno le ya Lobatse di ikaegile ka temo thuo, ka jalo go botlhokwa gore seabe sa toropo eo mo go kganeleng kanamo ya bolwetse jwa tlhako le molomo, se oketsege.

Mokhanselara wa Tsopeng Borwa, Rre Moalosi Rasesia a re itsholelo ya Lobatse e ikaegile thata ka thekiso ya kgomo, ditswakgomong le tshugo ya matlalo ka jalo sepe fela se se ka amang mohama wa thuo ya kgomo se tsile go ama toropo eo fela thata. BOPA