10 Jan 2024

Banni ba kgotla ya Borotsi kwa Bobonong ba re ba santse ba tshwenngwa ke tlhaelo ya melemo kwa kokelong ya bone.

 

Mongwe wa banni, Rre Israel Tebelelo o tlhalositse fa seemo se ise se siame ka melemo mengwe e santse e le dingalo go bonwa mo dikokelong.

 

O tlhalositse fa e a re ba tlhokile melemo kwa kokelwaneng ya Borotsi ba rotloediwe go ya go e tsaya kwa kokelong e kgolo mme le gone nako tse di ntsi ba seke ba e fithele.

 

O ne gape a tlhalosa fa nako e melemo e leng teng, ba tlhoka motho yo o e abang, selo se a reng se baya matshelo a bone mo diphatseng. 

 

Rre Tebelelo a re ba sale ba ikuetse gore kokelwana ya bone e okediwe ka dipalo tsa batho di oketsegile mme ga ba ise ba bone thuso. 

 

Matshwenyego a dule kwa phuthegong ya kgotla e e neng e buisiwa ke mopalamente wa kgaolo ya Bobonong, Rre Taaolo Lucas ka Labobedi.

 

Rre Tebelelo o ne gape a ngongorega ka lebaka le motho a le tsayang a santse a letetse go dirwa loaro, a tlhalosa fa se se baka gore bolwetse bo felele bo keketse.

 

Mme Elizabeth Marumo ene o supile ngongora mabapi le go tlhoka mafelo a dikereke di ka tshwarelang ditirelo tsa tsone kwa go one mme a kopa mopalamente go tsaya kgang e ka tlhoafalo go itsa go ntsifala ga bomaipayafela.

 

Mme Marumo o tlhalositse fa madi a a duedisiwang dikereke a le mantsi, bogolo jang ka di sa dire dipoelo dipe.

 

E rile a ba kgwa dikgaba, Rre Lucas a tlhalosa fa go itumedisa go bo bogodu jwa loruo bo wetse kwa tlase.

 

A re go diragetse jalo ka tshwaragano ya ba-na-le seabe ba tshwana le dikgosi, mapodisi le morafe.

 

Rre Lucas o ne a kgothatsa banni ba Borotsi go nna pelotelele ka ditsholofetso tse di neng tsa dirwa ke puso go abela ba ba neng ba thukuthiwa ke magodu loruo di tlaa diragadiwa.

 

O ne a phophotha mapdisi legetla go bo ba berekile ka go mekamekana le bogodu jo bo neng bo sa bontshe morafe boroko a bo a ba kgothatsa go tswelela ba tshwaragane le mephato e e itebagantseng le go bona gore leruo la Babirwa le babalesegile.

 

Mo go tse dingwe Rre Lucas o ne a etsese banni fa e tlaa re morago ga ditlhopho tse di tlang dikgaolo tsa Borotsi le Lepokole di bo di ikemetse e bile seo se tlaa tokafatsa go goroga ga ditlhobololo.

 

Fa a ntsha la gagwe, mookamela mapodisi a Bobonong, Superintendent Paul Seoko o tlhalositse fa a santse a tshwenngwa ke batho ba ba tsweletseng ka go fitlha dirukutlhi mo malwapeng, a tlhalosa fa go dira jalo go sa siama ka ba folodisa maiteko a sepodisi a go lwantsha botlhokatsebe.

 

Superintendent Seoko o ne a tlhalosa fa go na le serukutlhi se batho ba Borotsi ba se itseng e bile ba anwa le sone bojalwa mme ba palelwa ke go begela mapodisi ka mabaka a gore ba a se tshaba.

 

O ne a re kgang e e a tshwenya ka motho wa go nna jalo a le borai mo matshelong a batho mme go tlhoka tirisano mmogo fa gare ga mapodisi le morafe ka ba ka seke ba kgone ba le nosi. Bokhutlo