20 Nov 2023

 

Modulasetilo wa khansele ya Tutume, Rre Thatayaone Kehitile o kopile setshaba go ema nokeng maitiso a setlhopa sa masole (BDF bands in concert) a maikaelelo a o ne e leng go kokoanyetsa ba ba tlhokileng lesego madi.

Rre Kehitile o kopile se fa a ne a amogela dimpho tsa madi, tse di neng di abelwa khansele ya Tutume ke setlhopha seo kwa maitisong a se neng se a tshwere kwa Tutume ka Matlhatso.

Madi a, a kgaogantswe Maposa Development Programme le Tutume/Nata Remote Area Programme mme lengwe le lengwe le tla abelwa P12 500.  Rre Kehitile o akgoletse setlhopha tiro e ntle e se e direlang setshaba a re kgaolo ya Tutume e lesego ka basole ba nna ba e gopola. O  supile fa e ne yare bekeng e e fetileng, masole a a ithutelang tiro kwa Pandamatenga, a ne a abela sekole se sebotlana sa Maposa.

A re seo se ba bontsha fa tiro ya sesole e se go sireletsa setshaba fela, mme ba tshwenyega ka matshelo a batho bogolo jang ba ba tlhokileng lesego mo botshelong. O kopile setshaba go tsaya karolo le go rotloetsa kgolo ya setlhopha ka go tsena maitiso a sone ka dipalo tse di kwa godimo.

A re ka go dira jalo le bone ba tlaa balelwa mo bathong ba ba nang le lorato le kutlwelobotlhoko mo go ba ba tlhokang.

Mookamela setlhopha, Major Warona Garekwe a re maitiso a, a na le dingwaga a ntse a tshwarwa, maikaelelo e le go kokoanya madi go thusa ba ba tlhokileng lesego mo botshelong le makalana a bopelotlhomogi.

Major Garekwe a re ba mo ngwageng wa masome a mararo ba ntse ba tshwara maitiso a mme a leboga kemo nokeng e ba e filweng ke batho ba kgaolo ya Tutume ka go tla ka dipalo tse di kwa godimo.

A re ba rotloetsa setshaba go ema kgatlhanong le kgokgontsho ya bong a bo a tlatsa ka gore ke nako gore mongwe le mongwe a fetole ka fa a ntseng a dira dilo ka teng mme ba eme ka lentswe le le lengwe go lwantsha kgokgontsho.

Ba khamphani ya BOTASH go tswa kwa Sowa ba ne ba rotloetsa setlhopha seo ka P8 500. BOKHUTLO