27 Sep 2023

Maloko a kereke ya United Congregational Church of Southern Africa (UCCSA) ba lekalana la Zwenshambe kwa kgaolong ya Bokone Botlhaba, ba sa tswa go rulaganya mogwanto wa dikhilomithara tse di lesome, e le mosepele o o duelelwang.

Zwenshame UCCSA, e e leng ka fa tlase ga ketelelopele ya ga Moruti Dingaan Mulale, e akaretsa makalana go tswa kwa metseng ya Kalakamati, Sekakangwe, Mbalambi, Gambule, Mulambakwena le Zwenshambe.

Mogwanto oo, wa go tswa Mulambakwena go ya Zwenshambe o ne o tshwerwe kgwedi eno e le masome mabedi le boraro.

Fa a tlhalosa maikaelelo a mogwanto, Moruti Mulale o boletse fa e le go kokoanya madi a ka one makalana a marataro ao, a tlaa a dirisang go ipelega.

A re moono mogolo ke go aga matlo a kobamelo a makalana mangwe, go feleletsa a mangwe a a tsweletseng ka go agwa ga mmogo le go tsibogela mangwe a a tlhokang go tlhabololwa le go dirwa dipaakanyo dingwe.

Moruti Mulale o supile fa ba Sekakangwe le Gambule ba obama ka fa tlase ga ditlhare mme seo se ba baya ka fa mosing fa maemo a bosa a sa iketla.

Kwa Mulambakwena gone go tlhalosiwa fa kago ya kereke e santse e tsweletse ka go agwa mme moruti o lebogile leloko lengwe la kereke eo, Rre Tabathu Mulale go fa kereke boroko mo kagong ya gagwe go nama ba obamela teng.

A re ka bontsi jwa maloko e le ba ba bonang letseno ka madi a tandabala fa bangwe ba le bona ka thata, ba ne ba ikuela mo bangweng le go rulaganya mosepele oo.

O lebogile ratoropo wa Francistown, Rre Godisang Radisigo yo e neng e le motsamai mogolo wa mogwanto oo, ka go ba sekegela tsebe mme a amogela taletso ya bone ya go tla go tsaya karolo.

Moruti Mulale a re a mangwe maikaelelo a mogwanto ke go itshidila mebele.

Fa a tswa la gagwe, Rre Radisigo o akgoletse maloko a Zweshambe UCCSA mowa o ba o supileng wa go leka go ipelega, a bo a ba gwetlha go tswelela ba tshwaragane le fa go ka nna thata jang.

Rre Radisigo a re ba seka ba letlelela phefo go ba tsena ka bogare mme ba rurifatse se se omakwang ke leina la kereke eo.

A re gape ba ile tse di bosula ka seo se ka dira gore leina la Modimo le tswelele ka go tsholediwa.

A re kereke ya UCCSA e tlhaloganye fa e le nngwe ya tse di nnileng le seabe mo loagong la puso ya batho ka batho ya lefatshe leno.

O ne a ba gwetlha go tswelela ba rapedisa baeteledipele ba lefatshe, gore kagiso, ledula le thokgamo tse di renang mono di tswelele go ya go ileng.

Ratoropo o supile tlhobaelo ya go bo banana ba santse ba goga dinao go ikgogela kwa ntlong ya thapelo, fela a kopa maloko a kereke gore ba seka ba ba felela pelo go ba rotloetsa go ya kerekeng gore molelo o seka wa tima.

Le ene o ne a leboga ba UCCSA ka go mo neela tlotla eo, ya go mo laletsa kwa tirong eo, a tlatsa ka go tlhalosa fa mogwanto oo o thusa go lapolosa ditokololo tsa mmele.

Rre Radisigo le lekoko le le neng le mo patile ba itlamile go ntshetsha kereke eo P2 400 fa makalana a kereke eo a Zwenshambe, Mbalambi, Mulambakwena, Sekakangwe le Kalakamati one a kgonne go kokoanya P13 591.

Mo godimo ga moo, bangwe ba ba neng ba tsere karolo mo mogwantong oo, ba ba akaretsang Kgosi Moses Mabutho wa Zwenshambe, modulasetilo wa komiti ya ditlhabololo tsa Zwenshambe, Rre Fidzani Rauwe le Rre Mbakiso Mukokomani go tswa Mapoka le bone ba ne ba itlama go ntshetsa mogwanto oo P250, P200 le P1 000 ka go latelelana ga bone.

Mo kamogelong ya gagwe, Kgosi Mabutho, yo le ene e leng leloko la UCCSA, o supile fa phuthego e e senang ditiro e le moka e suleng.

A re ka jalo phuthego ya Zwenshambe e supile botshelo ka ntlha ya go rulaganya mogwanto oo.

Kgosi a re o na le tshepo ya gore ka thato ya Modimo ba tlaa kgona maikemisetso a bone. BOKHUTLO