18 Sep 2023

Kgosi Serogola Seretse wa Ga-Mmangwato o roletse morafe mogopolo wa gore magosi mangwe a tlhatlosiwe maemo.

O boletse kwa Serowe ka Labone fa se e santse e le mogopolo ka jaana Tona wa Lephata la Dikgaolo le Tlhabololo Magae a tshwanetse go o baya monwana pele makgosi ao a ka simolola tiro.

A re kakanyo ya go tlhatlosa magosi mangwe maemo e tla morago ga go tlhokafala ga moemela kgosi kwa Serowe, Kgosi Kgomotso Boiditswe ka Seetebosigo.

Kgosi Seretse a re Kgosi Bakae Khumo o tlaa tsholediwa go tswa mo maemong a kgosana e e kwadisang ditsheko go nna moemela kgosi.

Kgosana wa tetlanyo ya Dinokwane, Kgosi Keoitse Mokamogo, o tlaa tsaya maemo a ga Kgosi Khumo a pele.

Kgosi Sechele Kgari wa kgotla ya Mokwena ene o tlaa tsaya maemo a ga Kgosi Seretse Tshukudu yo o tlogetseng tiro ka bogodi.

“Ke tlhoka batho ba ba ka ntheetsang, ba ba ka reetsang puso e Batswana ba e romileng ebile e le batho ba ba sisimogang, ba ba ka direlang lefatshe le ka fa go tshwanetseng” ga bua jalo Kgosi Seretse.

O ne a supa fa morero e le konokono, ke ka moo a neng a bona go tshwanela gore a bitse morafe go ba rolela diphetogo pele di diragala.

Morafe o ne wa supa fa o itumelela morero oo. 

Ba re kgosi ke setlhare se se tshwanetseng go nna le dikala tse bone e le morafe ba ka di nnang moriti, ba tswelela ba supa fa ba dumela gore jaanong thuso e e ntseng e le bonya e tlaa fefoga ka jaanong magosi a tlaa bo a oketsegile mo kgotleng. Ends