14 Sep 2023

Banni ba Salajwe le Kaudwane ba kopa gore tsela e e tswang kwa motseng wa Letlhakeng go ema kwa Kaudwane e tshelwe sekontere.

Ba buile se mo diphuthegong tse di neng di buisiwa ke Mopalamente wa Takatokwane, Rre Tshoganetso Leuwe bosheng.

E rile a amogela baeng kwa kgotleng ya Salajwe, mothusa Kgosi, Wetsho Gobusang o ne a supa fa keletso ya bone e le go tshelelwa sekontere mo tseleng eo, gore mesepele ya bone e nne motlhofo.

E rile a lekodisa banni ka tsa kwa palamenteng, Mopalamente Leuwe a supa fa a ntshitse tshutiso ya gore puso e sekaseke dituelo tsa RASA, a supa fa madi a teng a le kwa tlase thata e bile a siilwe ke nako.

Rre Leuwe a re madi ao a ka thusa batho ba ba berekelang kwa go senang ditlamelo teng, le go ngokela bodiredi kwa dikgaolong tse di kgakala.

A re tshutiso ya bobedi ke e e neng e kopa gore dikokelwana tsotlhe tsa kgaolo ya Takatokwane, di gokelelwe digenereitara gore e re fa motlakase o timile melemo e seka ya senyega.

O supile gape fa a ne a kopa puso go busetsa dikokelwana kwa lephateng la Dikgaolo le Tlhabololo magae, a supa fa e rile di santse di le koo, di ne di dira sentle fela thata ka ditshwetso di ne di tsewa gone foo eseng jaaka gompieno.

 Mo go tse dingwe, Rre Leuwe o tlhalositse fa Palamente e fetisitse melawana e le lesome le borataro, mme a tlaa  ba rolela e le meraro fela.

 Mopalamente Leuwe o tlhalositse fa ba sa kgona go buisana ka molao wa batho ba ba ratanang ka bong, ka jaana batho ba maranyane ba ne ba o gasitse ka tsela e e seng yone, mme wa tsosa kgaruru mo Botswana.

Rre Leuwe a re nnete ya kgang ke gore batho ba ba ratanang ka bong ba ne ba isitse puso kwa lekgotleng la ditsheko gore go gatakiwa ditshwanelo tsa bone, fa puso e ne e supa fa go ratana ka bong e le molato mme batho bao ba ne ba atlega mo kgannyeng eo.  

 O supile fa puso e ne ya ipelaetsa ka kgang eo mme ya nna ya latlhegelwa ke kgetsi.

A re molao o mongwe o fetisitsweng ke wa go laola ditlhobolo tse di seng ka fa molaong mo lefatsheng leno, ka jaana ditlhotlhomiso di supa fa borukutlhi jwa ditlhobolo bo dirwa ka ditlhobolo tse di seng ka fa molaong.

Rre Leuwe o ne a supa fa ba ne ba buisana gape ka molao wa diritibatsi mo lefatsheng leno, a re ditlhotlhomiso di supa fa batho ba le bantsi ba tsenwe ke bolwetse jwa tlhaloganyo, mme bo bakiwa ke tiriso ya ditagi.

Mo go tse dingwe, banni ba Salajwe le Kaudwane ba ne ba supa fa ba tshwenngwa ke go tlhoka motho yoo ba abelang melemo mo dikokelwaneng tsa bone.

Banni ba Kaudwane ba ne ba supa fa ba lebogela palo e e oketsegileng ya batho ba ipelegeng, ya lekgolo le masome a marataro.

Ba kopile gore go baakanngwe terata ya diphologolo ka jaana ditlou di e sentse, e bile go tlhoka terata go ba baa ka fa mosing ka jaana ditau di ja leruo la bone.

Fa a araba ka kabo ya melemo mo dikokelwaneng, mooki wa kokelwana ya Salajwe, Rre Sekao Bagonoti, o ne a supa fa go na le tlhaelo ya baabi ba melemo mo lefatsheng leno. Bokhutlo