01 Jun 2023

Dipalo di supa fa bomme mo kgaolong ya Palapye ba le ko pele mo go itlhatlhobeleng mogare.

Go ya ka dipalo tsa batho ba ba itlhatlhobetseng go simolola Moranang ngwaga o o fetileng go fitlhelela Mopitlo ngwaga ono, go bomme ba le 9 531  fa 4 232 e le borre.

Mo dipalong tseo ba le 400 ba na le mogare, bomme ba le 215 mme 185 e le borre.

Kgaolo ya Palapye e na le batho ba le 16 920 ba ba tsayang diritibatsi tsa mogare wa HIV, bomme ba le 10 733 fa borre ba le 6 200.

Fa a bua kwa letsatsing la go tshuba dikerese kwa Moreomabele bosheng mothusa mogolwane wa tsa merero ya HIV/AIDS mo Palapye Rre Obusitswe Pitlagano a re ba tshwenngwa ke borre ba go supafalang ba le maoto a tshupa go itlhatlhoba mme ba tlhokana le go kgothadiwa go dira jalo ka se, se ka babalela matshelo a bone.

O supile fa ba tsweletse ka go tlhatlhoba mogare ba dirisanya le makalana a a farologaneng a tshwana le ba Tebelopele, Humana le a mangwe.

Borre ba kgotlhaditswe go emela dikgang tsa botsogo jwa bone le malwapa a bone ka dinao.                    

Mopalamente wa Serowe Borwa Rre Baratiwa Mathoothe o ne a iteele kobo moroko a gakolola borre  a re dipalo tsa ba botsogo di supa fa ba le maoto a tshupa mo go tseeng ditlamelo tsa botsogo.

A re nako eno ga se ya go kgetholola ba ba tshelang ka mogare, mme ke ya go ba fa lerato, kgothatso le kemo nokeng gore ba gololesege go tsaya diritibatsi tsa bone.

Rre Mathoothe o ne a kgala ba ba tlogelang ka dipilisi tse di ritibatsang mogare, a re ba tsenya matshelo a bone mo diphatseng.

Mogolwane wa DHMT Othusitse Moube a re letsatsi la go tshuba dikerese ke go lemoga batho ba ba tshelang ka mogare le  go gopola ba ba tlhokafetseng ka ntlha ya mogare.  

Rre Moube  a re gape ke nako ya go tsibosa setshaba ka HIV/AIDS gammogo le fokotsa dikgang tsa kgetholola ya batho ba ba tshelang ka mogare.

A re maikaelelo ke go rotloetsa le go kgothatso setshaba go tswelela ba lwantsha mogare wa HIV/AIDS.

Rre Moube a re letsatsi le, le ba fa sebaka sa go lemoga seabe sa ba ba ithaopileng go thusa batho ba ba amilweng ke HIV. BOKHUTLO