24 May 2023

Banni ba Majwanaadipitse mo kgaolong ya Serowe Bokone ba lela ka tiego ya ditirelo mo motseng wa bone ka ntata ya tlhaelo ya badirela puso.

Banni ba boletse mo potsolosong bosheng gore ba thusiwa ke bodiredi go tswa Tshimoyapula le Serowe, mme ka mabaka a tlhaelo ya dikoloi go tsaya lobaka gore ba  tle go ba thusa.

Ba boletse fa bontsi jwa banni  e le batho ba ba dikobo dikhutshwane ba ba thusiwang ke puso ka mananeo a boipelego, mme ga go motlhofo go latela ditlamelo kwa di leng teng.

Mongwe wa banni, Rre Obokeng Matlho o boletse fa e le mongwe wa ba ba filweng leruo ka lenaneo la Nyeletso Lehuma, mme leruo leo le swa ka bontsi, ka gore ga go na mokenti mo motseng.

Rre matlho are ba latela mokenti kwa Tshimoyapula, kwa gantsi ba fitlhelang a tserwe ke ditiro tse dingwe kana go sena koloi e a ka e dirisang go ya go ba thusa kwa Majwanaadipitse.

O boletse fa puso e ne e dirile botoka go thusa batho ba ba kgakala le ditlamelo ka leruo gore ba tswe mo mophakong, mme jaanong ga gona maduo a nametsang.

Modulasetilo wa komiti ya ditlhabololo tsa motse, Rre Lefoko Keogoditse o lebogetse puso go bo erile bosheng bangwe ba amogela dipudi tsa Nyeletso Lehuma, mme a bolela fa leruo le ba le filweng le tlhoka go phunyediwa sediba sa lone le le nosi.

Rre Keogoditse o boletse fa ba nosa leruo la bone mo sedibeng sa morafe se se laolwang ke ba koporase ya metsi.

A re batho ba nwa mo mokorong le leruo, mo a bolelang go ka baka malwetse. O tlhalositse fa tsela e e tswang Tshimoyapula e le maswe fela thata mo go dirang gore bodiredi bo seka jwa bonala kgapetsa kgapetsa go ba thusa.

O boletse gape gore bangwe badirelapuso ba ga na go direla kwa motseng oo ka mabaka a mantsi mme mathata e le tsela e senyegileng, le go tlhoka ditlamelo tse dingwe.

Rre Ontiretse Didibeng ene o boletse fa go tlhoka kgosi mo motseng wa bone e le gone mo go dirang gore ditlhabololo di salele kwa morago.

O boletse fa ba sa bolo go ntsha leina la kgosi yo ba eletsang gore a ba etelele pele, mme nako kgolo ke eno, ka gotwe go na le batho ganang leina la teng.

Rre Didibeng o boletse fa ditsheko di sa sekwe ka gore ga gona kgosi.

Mokhanselara wa kgaolo eo, Rre Katlholo Tapologo, o tlhalositse fa motse wa Majwanaadipitse o le kgakala le ditlamelo, mme lentswe la gagwe lone le utlwala kwa  khanseleng, fa a batla bodiredi jo bo ka ba thusang ka ditlamelo.

O boletse fa khansele potlana ya Serowe e godisitswe maemo go ikemela ka nosi, a tlatsa ka gore o solofela fa ditirelo di tla atumela morafe.

Mokhanselara o boletse fa melemo mo kokelwaneng e tlhaela, matlwana a borutelo a barutabana le a boroko a tlhaela, mme a galaletsa sekole sa Majwanaadipitse go bo se dira sentle mo dithutong le fa se na le dikgwetlho.

Rre Tapologo o boletse fa ba kaboditsha ba le maoto a tshupa go baya morafe ditsha, mo bangwe ba felelang ba ipaya ditsha e se ka fa molaong. BOKHUTLO