• 

16 Mar 2023

Mapodisi a Middlepits a tlhotlhomisa banna ba le bararo mabapi le go fitlhelwa ka motokwane le dipudi tse go belaesegang di rekilwe ka motokwane.

Mookamela mapodisi a Middlepits mo Kgaolong ya Tsabong, Assistant Superintendent Kebadire Mmopi o boletse seo mo potsolosong le lekalana la dikgang la BOPA ka Labobedi.

Ast Supt Mmopi a re ba ne ba tshwara banna ba le babedi mo sekganeding sa tsela bosheng, mme e rile fa ba ba phuruphutsha  ba fitlhela ba pegile dipudi le dinku di le lesome mo koloing tse go neng go supa fa di sa kwadisiwa semmuso ka di ne di sena diteseletso.

A re mo ditlhotlhomisong, banna bao ba tlhalositse fa ba rekiseditse monna mongwe wa Bogogobo motokwane, mme boemong jwa madi a ba neela dihutshane. 

O boletse fa mapodisi a ne ba ragogela kwa lwapeng lwa monna yoo, go ya go iponela ka matlho, mme a supa fa ba ne ba tshegetsa boraro joo ka nakwana mo kgolegelong.

O boletse fa mo nakong eno balelaelwa ba emetse tsheko kwa ntle. A re ba le babedi ba ba fitlhetsweng ka dipodi ba tla lebisiwa molato wa go fitlhelwa ka leruo le le sa kwadisiwang mme ka ba ka bonwa molato ba ka atlholwa madi a a sa feteng P2 000 kana dingwaga tse tlhano mo kgolegelong.

Assistant Superintendent Mmopi o boletse fa yo o fitlhetsweng ka mephuthelwana ya motokwane ene a ka atlholwa madi a a fetang P5 000 kana kgolegelo.

O boletse fa mapodisi a sa jesiwe diwelang ke dikgang tsa motokwane, a supa fa e le kgang  ya botlhano go gatisiwa fa e sa le ngwaga o simologa.

Ast Supt Mmopi o ne a gakolola banni ba kgaolo eo le setshaba ka kakaretso go tila go rekisa motokwane, ka e le setlhatshana se se borai mo botsogong, gape a tlhalosa fa o wela mo diatleng tsa bana ba dikole, selo se se ka felelang se ba senyetsa bokamoso. BOKHUTLO