25 Jan 2023

Balemi ba kgaolo ya Morolong ba re monongwaga go lebega ba sena go tswa ka sepe kwa masimo, ka jaana pula e le boutsana go ralala kgaolo.

Mo potsolotsong le BOPA, moanamisa mafoko wa Good Hope District Crop Farmers Association, yo e bileng e le mongwe wa balemi ba kgaolo eo, Rre Johnson Maseng a re o lemoga gore monongwaga go tsile go nna leuba.

Rre Maseng a re letlhoko la pula go ralala kgaolo eo le dirile gore balemi ba palelwe ke go baya ditema. 

O tlhalositse gore lephata la temo-thuo le sale le ititeile ka thupana go abela balemi dipeo, sebe sa phiri e nnile gore pula ebo e sa ne.

“Ke ne ke beile ditemanyana tsa mmidi tse ke di jadileng Sedimonthole a ya fifing, mme jaanong dijalo tsa me di simolotse go babalelwa ke letsatsi ka gore pula e sale e eme go na,” a tlhalosa.

O tlhalositse gore monongwaga ga a bone fa go na le molemi mongwe yo o tlaa tswang ka thobo mo masimo ka gore le yone nako ya letsema jaanong e setse e ile.

A re mo nakong ya gompieno dijalo ka bontsi di a bo di setse di tloga di butswa, mme gompieno ke matlhotlha pelo fela ka gore le gone go pitikolola mmu bontsi ga bo ise bo go dire.

A re le fa go ka okediwa nako ya letsema e e tlang bokhutlong kgwedi eno e ya fifing, ga a bone go ka nna le dipoelo ka gore go le gantsi phefo ya borwa e a ne e sale e tlhabile. 

Rre Maseng o tlhalositse gore ene fa pula e ne e ka na go ise go tswalelwe letsema gongwe o ne a ka lema dinawa le manoko ka e le dijalo tse di sa tseeng lobaka go butswa.

Rabalemisi wa kgaolo ya Morolong, Rre Nigel Modisaemang a re le bone e le lephata ba tshwentswe ke letlhoko la pula.

A re mo nakong ya gompieno ba akanyetsa gore go ka tswa go lemilwe diekere fela di le ka fa tlase ga makgolo a supa, mme e bile go lebega go se na go tswa sepe mo go tsone, ka pula e sale e na ka Sedimonthole ngogola.

Rre Modisaemang o supile fa balemi ba sale ba phakile dipeo, mme ba swabisiwa ke seemo sa loapi, a tlatsa ka go re le beng ba diterekere go lebega letsema la ngwaga o ba ne ba le ipaakanyeditse sentle.

A re mo kgaolong ya gagwe molemi a le mongwe fela yo o lemelang kgwebo ke ene a neng a setse a lemile fa manoto a mangwe e le balemi ba ba botlana.

Mogolwane wa tepo loapi, Rre John Stegling a re ba solofetse pula e e seng ya sepe beke e, mme e tlaa re Tlhakole a simolola a bo e le gone dipula di simololang go na ka mashetla mo kgaolong ya borwa.

O tlhalositse gore kgwedi ya Hirikgong ga se gantsi pula e na e le ntsi mo kgaolong ya borwa, a re sebe sa phiri fela ke gore phefo ya borwa e a ne e sale e tlhabile, mariga a santse a le kgakajana. BOKHUTLO