24 Jan 2023

Khansele ya Gaborone e tlaa reka ditena tse di forongwang kwa letamong la Gaborone go aga dikago dingwe tse di mo lenaneong la ditogamaano tsa dilthabololo.

Go buile jalo mopalamente wa Gaborone Botlhaba, Rre Dumezweni Mthimkhulu kwa bokopanong le badiri ba ditena tseo bosheng. 

Rre Mthimkhulu a re seo e tlaa bo e le maiteko go rotloetsa dikgwebo tsa banni ba kgaolo eo.

Ka jalo, o ne ba kopa go foroma ditena ka matsetseleko le ka manontlhotlho, le go ikgobokanya gore ditena tsa bone di tle di rekwe motlhofo.

Rre Mthimkhulu o ne a tlhalosa fa ba tshwanetse go ikgobokanya ka fa molaong ka seo se tlaa dira gore ba itshetlele, bogolo jang ka ditlhwatlhwa gore ba seka ba jewa ntsoma.

Le fa go ntse jalo, mopalamente o ne a gakolola Batswana ba ba thapang batswakwa kgatlhanong le go dira jalo, a tlhalosa fa tiro ya go dira ditena e tshwanetse go namola bone Batswana leuba gore ba bone lemme le ba ka itshetsang ka lone.

Fa a tswa la gagwe, mothusa mokwaledi mo khanseleng ya Gaborone, Rre Olebile Mafala o ne a rurifatsa fa khansele e tlaa tlhoka ditena tse 200 000 go aga dikago dingwe tse di mo lenaneong la ditogamaano tsa ditlhabololo.

Rre Mafala a re ba tlaa reka ditena tseo ka jaana ba lemogile fa di le boleng jo bo kwa godimo e bile di tshwana le tse di ntseng di dirisiwa mo dikagong dingwe.

Ka jalo o ne a ba rotloetsa go ititaya ka thupana go tswelela ba dirisa di-tsa tlholego tse di mo lefelong la bone go inamola leuba  le gone gore ba nne le seabe mo itsholelong ya Botswana. 

Banni ba ne ba iteela mogolokwane mogopolo wa go reka ditena mo go bone, ba tlhalosa fa ba sa bolo go emela go utlwa dikgang tseo.

Moemedi wa bagwebi ba ditena, Rre Joseph Majapi a re go molemo gore go bo go lemogilwe gore ba dira tiro e e botlhokwa mo setshabeng, ka ba tlaa nna le seabe mo itsholelong ya lefatshe.

Ka jalo o ne a solofetsa fa ba tlaa tswelela ba foroma le go rekisa ditena gore ba kgone go itirela letseno, le go dira ka natla gore ba forome ditena ka dipalo tse di kwa godimo.

Rre Jobs Baphuthele ene o ne a re ba ntse ba sena bareki ba ba tlhomameng, ka jalo gore puso e bo e bone go tshwanela go reka mo go bone ke maiteko a a ba itumedisang e bile ba a amogela ka tsoo-pedi. BOKHUTLO