24 Jan 2023

Go nwa phetelela go tsweletse ka go phirimisa ditoro tsa bokamoso jo bo solofetsang jwa banana ba motse wa Mmashoro.

Mo potsolosong bosheng, mothusa kgosi wa Mmashoro, Rre Robert Makeshane o boletse fa maitshwaro a banana ba motse oo a sa jese di welang ka jaana bangwe ba setse ba fapogile mo sethong se se amogelesegang ka ntlha ya tiriso botlhaswa ya nnotagi.

Kgosi Makeshane a re go a tshwenya go bo banana bangwe ba felela ba latlhetswe mo kgolegelong ka lebaka la melato e ba e dirileng ba le mo sediding sa dino. 

A re go a swabisa go bo ba tsweletse ka go kwadisa dikgang tse mo go tsone banana ba tlhoketseng batsadi le bagolo mo motseng botho le go ba tlhapaditsa.

Kgosi Makeshane a kaile fa modumo wa diletso o o sa laolesegeng le one o na le seabe mo go tsweng mo tseleng ga banana, a tlhalosa fa ba okwa ke diletso tse di sa lediweng ka fa molaong e bile di lediwa ka dinako tse di sa letlelelweng.

O supile fa thekiso ya bojalwa ntle le teseletso, ga mmogo le go titielwa ga majalwa a a sa letlelelweng le gone go bifisa seemo.

Le ntswa go santse go le thata, Kgosi Makeshane o akgoletse mapodisi maiteko a bone a a tsweletseng a go laola seemo, mme a gatelela botlhokwa jwa gore ba-nale seabe ba bangwe le bone ba thuse ka fa ba ka thusang ka teng gore kgabagare motse o robalelwe ke ditlhokwa. BOKHUTLO