22 Jan 2023

Banni ba Dikgonnye ba kopilwe go tshwaragana le boeteledipele jwa motse gore ditlhabololo di nne motlhofo go goroga kwa go bone.

Mopalamente wa Mochudi Bophirima, Rre Mmusi Kgafela o buile seo mo phuthegong ya kgotla kwa Dikgonnye bosheng.

A re e re jaaka e le Tona wa Papadi le Madirelo, banni ba tshwanetse go itse fa a sa emela kgaolo ya Kgatleng Bophrima fela, mme a emetse Botswana jotlhe, ka jalo a lebagane le namane e tona ya tiro.

Rre Kgafela a re jaaka Botswana a tlaa bo a amogetse Africa yotlhe ka kgwedi ya Tlhakole mo phuthegong ya African Continental Free Trade, tiro e nna ntsi mo go ene, ka jalo a rotloetsa banni go ikgolaganya thata le ba ba ka ba thusang go nna le seabe gore ba godise dikgwebo tsa bone.

Mopalamente Kgafela o rotloeditse Batswana go golagana le baemedi ba bone, go utlwa gore dikopo tsa bone tsa ditlhabololo mo motseng di eme jang.

“Fa o rometse kopo ga o ineele. Mokopi wa dithuso bagaetsho o nna letshwenyo, gangwe le gape o a botsa kgotsa o a gakolola fa ekete kopo tsa lona di tsaya lebaka”.

Mme Setlasila Kgakole, yo e leng mokhanselara wa kgaolo, o iteetse mafoko a mopalamente legofi, a re go botlhokwa gore e re fa go na le diphuthego tsa kgotla banni ba nne teng gore ba tle ba utlwe ka fa ditlhabololo di tlaa dirwang ka teng mo motseng wa bone.

Mme Kgakole a re fa botlhe ba ka tsaya boikarabelo jwa go tsenelela diphuthego tsa komiti ya tlhabololo magae, tsa kgotla le go sala morago dikopo tsa bone tsa ditlhabololo mo motseng wa bone, Dikgonnye o ka bona ditlhabololo.

Mo go tse dingwe, Kgosi Ishmael Rakgati wa Dikgonnye o kopile gore fa tsela ya Dikgonnye-Kgomodiatshaba e dirwa, go hirwe banana ba motse oo go ba tlhamela mebereko.

Kgosi Rakgati o boletse fa bontsi jwa banana ba motse oo, ba felela ba inaakanya le borukutlhi e le tsela nngwe ya go leka go itirela madi, ka jalo fa ba ka neelwa tshono ya go bereka borukutlhi bo ka wela tlase. BOKHUTLO