12 Jul 2022

Gonne kwa ba le babedi kgotsa ba le bararo ba phuthegileng gone, ka leina lame, foo nna ke gone mo gare ga bone. 

Go diragatsa temana e, e e mo go Mathaio 18:20 mo Baebeleng,  dikereke ka go farogana di ne tsa kopana kwa ntlong lohalahala ya Boipuso mo Gaborone ka Tshipi.

Moletlo o, o o neng o rulagantswe ke lephata la Banana, Bong, Metshameko le Ngwao, o ne o tsenwe ke matona a puso ba akaretsa tona wa Tsa Madi, Mme Peggy Serame le wa banana Rre Tumiso Rakgare.

Moletlo o ne o rulagantswe go wetsa metseletsele wa dikgaisanyo tse ba ntseng ba di tshwere tse makgaola kgang a tsone a tlaa nnang mo bekeng e e tlang ka malatsi a boitapoloso a ga Tautona.

Dibui ka go farologana ba akgoletse lephata la Banana, Bong, Metshameko le Ngwao ka maiteko a lone a go kopanya dikereke ka go farologana ba supa fa se se tsisa mowa wa kagiso le popagano.

Dithapelo di ne di itebagantse le bolwetse jwa COVID-19, HIV/AIDS, botsogo, go rapelela boeteledipele le itsholelo le gone go isa malebo kwa Modimong.

Molaetsa o mogolo wa Letsatsi o ne wa tswa ka moeteledi mogolo wa lekgotla la dikereke mme a tswa kwa kerekeng ya Seventh Day Adventist, Moruti Strike Ben yo o neng a itebagantse thata le bolela ka bogolo jwa Modimo.

O kopile baeteledipele go nna le tomagano le Modimo gore ba kgone go fitlhelela tse ba lorelang lefatshe la Botswana. 

A re go dira jalo go botlhokwa ka go nne moeteledipele o tlaa bo a diragatsa thato ya Modimo mo go tsotlhe tse a di dirang.

Moruti Ben a re boeteledipele bo tshwanetse go itse fa go direla setshaba e le thomo ya Modimo, ka jalo ba dire kgolagano e e popota le Ene gore ba diragatse thomo e ka ketelelo pele le botlhale jwa Modimo. Bokhutlo