26 Apr 2022

Monna mongwe wa dingwaga tse di masome a mane le boferabongwe wa Rapplespan kwa kgaolong ya Kgalagadi Borwa o fitlhetswe a tlhokafetse fa thoko ga tsela kgwedi eno e le lesome le bosupa.

Go ya ka mookamela mapodisi a Middlepits, Assistant Superintendent Kebadire Mmopi mohiti ka tsela o ne a bona monna yoo a khubame ka mangole a ngaparetse terata e e ageletseng tsela, go lebega a sa tlhole a le mo botshelong mme a potlakela go begela mapodisi.

Assistant Superintendent Mmopi o tlhalositse fa mapodisi ba ne ba ragogela teng mme ba feta ba isa rre yoo kwa kokelong ya Tsabong kwa ba bongaka ba fetileng ba tlhomamisa fa a setse a tlhokafetse.

A re mo nakong ya gompieno, moswi o kwa setsidifatsing sa kokelo ya Tsabong mme o tlaa romelwa kwa kokelong ya Princess Marina, go ya go tlhatlhobiwa ke ba bongaka fa ditlhotlhomiso di sa ntse di tsweletse.

A re go ya ka masika a moswi, go lebega a ne a le nosi mo mosepeleng go tswa Bogogobo kwa a neng a nna teng mme go lebega a ne a ya Middlepits, dikhilomithara di ka nna tlhano.

O gakolotse banni go nna ba kopa bangwe go ba pata mo mosepeleng, bogolo jang fa ba le bokoa, go itsa ditiragalo tsa mofuta o. BOKHUTLO