19 Apr 2022

 Borre ba Pallaroad ba rotloeditswe go tsaya boikarabelo jwa go tlhokomela malwapa le go ikgapha mo ditirong tsa borukutlhi tse di tsereng phekelo e sele.
Go supilwe fa borukutlhi le kgokgontsho ya bong di tshwenya mo motseng oo.
Kgosi Moses Mpaesele o buile jaana fa a amogela baeng kwa thuto-puisanyong e e neng e tshwaretswe kwa kgotleng ya Pallaroad ka Laboraro.
O ne a supa fa bogodu jwa leruo le jone bo sa ba robatse mo motseng, a tlatsa ka go re, ‘jo bo dirwa ke bana, e seng bagolo.
“Bana ba na le dikgomo, dipitse le dipudi mme potso e e tshwenyang ke gore ba di tsaya kae?”
O kopile Kgosi Felix Kgamane wa Shoshong gore a ba tswe maoto go ba kopela ba lenaneo la kgomoKhumo gore ba ba etele go ba thusa seemo se.
A re le bogodu jwa go thuba mantlo bo gorogile mo motseng wa gagwe, go tsewa dipompo tsa metsi.
O buile gore e ne le lekoko la gagwe ba tsile go thulanya ditlhogo gore borukutlhi le kgokgontsho ka go farologana ga yone di ka fenngwa jang.
Fa a tlhalosa maikaelelo a pitso e, morulaganyi wa tsa twantsho borukutlhi wa District No16, Inspector Malakia Gabana o supile fa go lemosegile gore borre ga ba ke ba nna teng ka dipalo tse di nametsang, fa go buiwa ka matshwenyego a a amang setshaba.
A re kgokgontsho ya bong e golela pele, mme borre ba supiwa ka monwana gore ke bone ba nang le seabe se segolo.
Ka jalo, o tlhalositse fa ba bone go tshwanela gore ba bitse borre ba tle ba utlwe gore matsapa di a tsaya kae, le go utlwa ka tse di bakang mathata a.
O rotloeditse borre ba Pallaroad gore ba itirele komiti e e tshwaraganeng le ya ditlhabololo tsa motse e e tlaa ba thusang go rarabolola diemo tse ba nang le tsone.
A re ba molao ba ka bua, mme dikgang le maikarabelo di mo morafeng.
Mo nakong ya gompieno, Inspector Gabana a re dibeteledi di oketsegile di gongwe le gongwe.
Okopile borre go nna le seabe mo tlhokomelong ya bana, gore ba kgone go lemoga fa bana ba tswa mo tseleng, a gatelela gore borre ba rwale boikarabelo a go tlhokomela malwapa otlhe, e seng a bone fela.
O kopile gore dikgang tsa bogodu jwa leruo di begwe gore mapodisi a kgone go bepisa seemo.
Fa a ntsha la gagwe, Kgosi Kgamane o tlhalositse fa thuto-puisanyo e, e itebagantse le borre ka e le bone ditlhogo tsa malwapa.
“Re batla go aga malwapa, ka jalo re bone go tshwanela gore re agele fa godimo ga rre, jalo go tshwanetse gore rre a bo a itlotla, mme rre wa gompieno o lebega e le selalome.
Selo se, ke sone se emisitseng puso ka dinao go leka go tla ka mananeo go lwantshana le seemo se,” a tlatsa.
Go tsweng goo-Lowe, Kgosi Kgamane a re rre e ne e le motho yo go dumelwang a le botlhale e bile a na le maatla a go rarabolola mathata, selo se se  fetogileng mo bogompienong.
Ka jalo, o kopile borre go fetola ka fa ba dirang dilo ka teng go rarabolola seemo se setshaba se lebaneng le sone se.
O ne a bolelela borre fa e le bone ba ka ikgalemelelang bana, e seng gore ba emele mongwe go tswa go sele gore a ba thuse.
“Ga go na ope yo o ka fedisang ditiro tse di sa nnang sentle tse, kwa ntleng ga bone badiri ba tsone ba e leng bana ba rona,” a tlatsa.
Fa a akgela, Rre Oduetse Tshobo, yo o neng a tsile pitsong e, o ikuetse ka kgang ya bogodu jwa leruo jo bo keketseng mo Pallaroad.
Se se gakgamatsang, a re ke go bona ngwana a fetsa sekole mo nakong e e sa fediseng pelo a bo a setse a na le moraka.
Fa a tsibogela dingongorego ka seemo sa borukutlhi, Inspector Gabana o supile fa dikgang tsa petelelo di sa ame bomme fela, a re le borre ba a amega.
 Ka jalo, o rotloeditse borre go gololesega go begela mapodisi melato e gore ba kgone go thusiwa.
Le fa go ntse jalo, o tlhagisitse gape fa go na le bomme bangwe ba ba gwebang ka mmele, ba e reng fa rre a sa dira tumalano ya gagwe le bone, ba bo ba fetola kgang ka maikaelelo a go pega wa rre molato wa petelelo.
Mo godimo ga moo, o tlhalositse fa go tlhamilwe ofisi e e itebagantseng le dikgang tsa kgokgontsho ya bong, gore batho ba phuthologe go bua mathata a bone le go fefosa dikgang tsa kgokgontso ya bong. BOKHUTLO