17 Jan 2022

Makhanselara a le mararo a kgaolwana tsa Moshupa Botlhaba, Lorolwane le Ga-Molopo ba ikanisitswe ka bosheng. Makhaselera ao , ba ikanisitswe  ke motshwarelela molaodi wa kgaolo ya Borwa, Mme Tuelo Gothaang.

Ba tlhophilwe ngogola Sedimonthole a le lesome le boferabobedi, morago ga go tlhokafala ga makhanselara a pele a dikgaolwana tseo. 

Mokhanselara wa Moshupa Botlhaba ke Rre Lentswe Mosanako, wa Lorolwane ke Mme Keitiretse Motsumi, fa wa Ga-Molopo ene e le Rre Kgotlaetsile Bantatetse.

Fa amogela makhanselara, modulasetilo wa khansele ya Borwa, Rre Thamiso Chabalala, o lebogile Modimo go bo o babaletse makhanselara, go tla go goroga mo ngwageng ono wa 2022.

Rre Chabalala a re ke keletso ya gagwe gore makhanselara ba gakologelwe fa go le botlhokwa go tsena mo ngwageng ono ka lebelo le le ko godimo.

A re lentswe la batho ke lentswe la Modimo, a tlatsa ka gore o eletsa gore ba amogelwe kwa dikhanseleng potlana tse ba kwa go tsone,  ba bo ba rutiwe tiro. 

Rre Chabalala a re ba tshwanetse go itse gore makhanselara a a tlhokafetseng, a ne a le mo dikomiting, a bo a re dikhansele potlana tse ba mo go tsone ba tlaa ba tsenya mo go tsone dikomiti tseo ka go farologana.

Fa a ema makhanselara a masha ao ka lefoko, mokhanselara Lazarus Ncube wa Pitsane o ne a ba itsise fa ba gorogile mo khanseleng ya Borwa, mme a solofela fa ba tsile go dira ka natla le ka botswapelo. 

A ba tlhalosetsa fa go sa lofelwe khansele le fa e le dikomiti.

Mokhanselara Ncube o ba boleletse fa batho ba ba tlhophile ka tshepho, a bo a re ba seka ba tlhabisa batlhopi ditlhong le fa e le ene ba seka ba mo swabisa le gone go mo tlhabisa ditlhong tota. BOKHUTLO