16 Jan 2022

Go tsaya karolo mo komiting ya ditlhabololo tsa motse go ka thusa go fetisetsa megopolo ya setshaba kwa pusong.

Mmaboipelego wa kgaolo potlana ya Mabutsane, Mme Segomotso Machola o buile se kwa phuthegong ya kgotla e e neng e buisiwa ke Mopalamente wa Jwaneng/Mabutsane, Rre Mephato Reatile kwa Sese ka Labone.

A re ba amogetse dikwalo di le supa fela tsa go ikopela boloko jwa komiti ya ditlhabololo ya Sese ntswa komiti e dirwa ka batho ba le lesome.

Mme Machola o rotloeditse banni go oketsa dipalo gore ba nne le seabe mo ditlhabololo tsa motse le lefatshe ka bophara.

O supile fa melawana e e tsamaisang dikomiti tsa ditlhabololo ekile ya bo e le kgatlhanong le gore maloko a bo a tsaya karolo mo dipolotiking, mme kwa morago ya fetolwa a re le fa go ntse jalo, maloko ga a letlelelwe go dirisa sepolotiki go tsamaisa dikomiti tsa ditlhabololo.

E ne e rile a ntsha pego, modulasetilo wa komiti ya ditlhabololo tsa motse wa Sese, Rre Toba Rabasimane a supa fa ba sa jesiwe diwelang ke gore banni, bogolo jang banana ba maoto a tshupa go ikwadisetsa boloko.

A re go tlhoka go nna tlhaga mo dikgannyeng tsa mofuta o go ka dia ditlhabololo tsa motse.

Rre Rabasimane o kopile puso go sekaseka go oketsa dikatso tsa maloko ka ba imelwa ke tiro.

A re lemme le ba atswiwang ka lone le kwa tlase thata mo go bakang gore bontsi bo seka jwa kgatlhegela boloko.

E ntse e le kwa phuthegong eo, Kgosi Justice Motlhalane o tlhalositse fa ba apesitswe kobo ka letshoba ke borukutlhi jo bo golelang pele mme a kopa puso go aga ofisi ya sepodise mo motseng ga mmogo le go oketsa bodiredi.

Kgosi Motlhalane o ne gape a ngongorega ka ditlhotlhomiso tsa sepodise tse a reng di ba kgaphela kwa ntle e le baeteledipele ba motse. A re batho ba le bararo ba nyeletse bosheng mo kgaolong, mme ditlhotlhomiso tsa mapodise ga nke di supa mo go tseneletseng gore batho ba jelwe ke eng.

O supile fa ba eletsa fa tsela ya Sese/Jwaneng e ka gopiwa gore ba kgone go e dirisa, ka jaana tsela ya sekonotere e e tswang Trans Kalahari e tsena mo Sese e dikologa. BOKHUTLO