29 Dec 2021

Bomme ba ba nyetsweng ba rotloediwa go rata le go tlotla bomatsalaabone ka e le bone ba ka ba buelelang fa go na le mathata. 

Thotloetso e, e ntshitswe ke mogakolodi wa mokgatlho wa Moiyabana Dingwetsi Group, Mme Matshidiso Mothanka kwa bokopanong jwa mokgatlho oo jo bo neng bo kopane le moletlo wa ngwaga o fela ka Tshipi.

Mme Mothanka a re fa ngwetsi e efa matsale lerato kana a mo tlhokomela go felela go nna le kagiso le thitibalo, ka jalo go seke go nne le dikgang tse mo nakong e nngwe di kgonang go tsisa kgotlhang.

A re ngwetsi fa a  tlhokomela matsalaagwe o a bo a ipatlela mmueledi ka e tlaa re nako e a nnang le dikgang tsa tlhoka-kutlwisisanyo le monna wa gagwe a kgone go mmuelelela a sa tsee letlhakore. 

A re go nna le kutlwano magareng ga bobedi joo go thusa gape gore matsale a eme ngwetsi nokeng. A re fa go ntse jalo, ngwetsi e kgona go tsaa matsalaagwe jaaka motsadi. 

Mme Mothanka o boletse fa ngwetsi e tshwanetse go nna le mowa o montle, ka jalo mangwe a maikaelelo a Moiyabana Dingwetsi Group ke go aga betsi gore ba nne le mowa o o eletsegang.

Mme Mothanka o supile fa mokgatlho wa bone o tlaa thusa gore go nne le kutlwano magareng ga bobedi jo, a supa fa go nna ngwetsi e le maemo a matona a a eletsegang a a tshwanetseng go a tsewa ka tlhoafalo. O ne a rotloetsa betsi go tlotla nyalo ka ditsela tsotlhe.

Modulasetilo wa Moiyabana Dingwetsi Group, Mme Obopeng Keatshotse a re mokgatlho wa bone o simolotswe ka 2018 ke bomme ba le barataro. A re mo nakong eno mokgatlho o o na le bomme ba le masome mane.

Mme Keatshotse a re tsholofeloke go re maloko a oketsege ka e bile o buletswe ngwetsi nngwe le nngwe. A re mokgatlho o o tlaa thusa maloko mo dikgannyeng tsa kgokgontsho ya bong, go intsha mo lehumeng le go tlhabolola ngwao ya nyalo. Bokhutlo