22 Dec 2021

Kgosana ya tetlanyo  ya kgotla yoora  Sebego  kwa Kanye, Rre Mokgowe Tshosa yo o tlhokafetseng  beke e e fetileng, o tlaa bolokwa mo Kanye tsatsi jeno. 

Rre Tshosa, yo o dingwaga di masome marataro le botlhano, o tlhokafetse morago ga go lwala ka lebaka le leleele. 

Motlogolo wa gagwe, Rre Kaelo Tshosa o tlhalositse mo potsolotsong le BOPA fa Kgosana Tshosa yo o neng a itsege ka leina la Faroku a tlhokafaletse mo lapeng.

O tlhalositse fa Kgosi Tshosa a ne a tlhongwa go nna kgosana ka 1990, mme pele ga moo, a berekile e le morutabana wa nakwana kwa sekoleng se sebotlana sa Samane, morago a direla mo go sa Kanye Private School e le morutabana wa sennelaruri.

Moswi Tshosa o dirile dithuto tsa gagwe tse dipotlana kwa sekoleng se sebotlana sa Logonono mo Kanye se mo nakong eno se bidiwang Motsatsing, mme a ya go tsweledisa dithuto kwa sekoleng se segolwane sa Seepapitso mo Kanye.

Moswi o tlogela batsalwa nae ba le bararo botlhe e le borre, bomogolowe ba le babedi le monnawe. BOPA