14 Dec 2021

Mogakolodi wa tsa boranyane wa lekgotla la thibelo kanamo ya mogare wa Corona, le le tlhomilweng ke Tautona, Dr Mogomotsi Matshaba a re dipatlisiso ka mogare o mosha wa Omicron di tsweletse.

Dr Matshaba o buile jalo maabane jaaka a ne a fa pego tebang le seemo sa COVID 19, a re dipatlisiso ka mogare mono gae di tsweletse.

Dr Matshaba a re maikaelelo ke go ithuta le gone go tlhaloganya gore mogare oo, o ka ama kgotsa wa gatelela batho ga mmogo le bangwe balwetsi ka go farologana go le kae, o supile gape fa dipatlisiso tseo e le go netefatsa gore melemo ya thibelo mogare wa corona e e mo tirisong e dira jang go ka thibela mogare oo.

Dr Matshaba o rotloeditse mowa wa tshisibalo mo setshabeng a re ba lephata la botsogo le boitekanelo ba malala a laotswe ka didirisiwa tse di tlhokegang go ka itepatepanya le diphetogo tse di bakiwang ke mogare oo.

Go sale foo, Dr Matshaba a re fa e sale mogare wa Omicron o tlhagoga, ngwana a le mongwe wa dingwaga tse tlhano o ne a amega, le fa go ntse jalo, a re ngwana yoo o dule mo serubing e bile o siame.

A re lekalana la Botswana Medical Regulatory Authority (BOMRA) le mo lenaneong la go simolodisa go kenta bana ba ba dingwaga tse di ko tlase gore ba tswelele ba sireletsegile.

Dr Matshaba o gateletse botlhokwa jwa go tsweledisa melawana ya itshereletso, a supa fa dipalo tsa tlhagogo ya mogare o mosha (new cases) di goletse pele.

A re dipalo tseo di oketsegile go tswa mo go makgolo a mane go ya kwa go dikete tse pedi le metso e le masome a mabedi le borataro.

A re seo se supa fa mo letsatsing go gatisiwa dipalo di tshwara masome a matlhano, a ba  a supa fa dikgaolo tse di amegang ka dipalo tse di kwa godimo e le ya Kgalagadi ga mmogo le Gaborone le metsi e e mo tikologong.

O boletse gore le fa mafelo a mangwe a sa amega thata seo ga se rebole gore bolwetsi bo fedile kwa mafelong ao.

Mo go tse dingwe, Dr Matshaba o kopile batho go nna keletlhoko, a re fa go kgonega ba fokotse mesepele gape ba ikgaphe mo ditirong tse di ka rotloetsang kokoano ya batho ka dipalo tse di kwa godimo. BOKHUTLO