29 Nov 2021

Kgosi kgolo ya Balete, Kgosi Mosadi Seboko a re nonofo ya boetelediple  e lemogwa ka go tlotla molao le go sala tsamaiso morago.

Erile a tlhoma mo setilong kgosi wa Hatsalatladi mo Kweneng  Kgosi Saki Gabanamotse, Kgosi Mosadi a mo gakolola botlhokwa jwa go busa morafe wa gagwe ka neelano le boikanyego a ikaegile ka go obamela molao.

“Rele bogosi re tshwenngwa ke dikgang tsa go tsamisa ka tshokamo mo go dirwang ke bangwe ka rona kgatlhanong le melao ee re kaelang ka fa re tshwanelang go dira thomo ya rona ka teng”, Kgosi Mosadi a tlhalosa.

Kgosi Mosadi o tsweletse a tlhalosa fa moeteledipele wa seemo sa ga kgosi Gabanamotse a tshwanela go nna boikanyego le go nna sekao gore setshaba se ase eteletseng pele se mo tshepe le go mo tlotla

“Re le baeteledipele ba setshaba, re tshwanetse go itlotla ka go direla ba re ba eteletseng pele ka boamaaruri le go itshupa le kafa re tsamaisang malwapa a rona ka teng gore setshaba se re se eteletseng pele se kgone go ithuta mo go rona”, Kgosi Mosadi a tshwelela ka dikgakololo.

O ne a kopa morafe gore e re ntswa kgosi a na le maitlamo ago ba direla ka boammaruri le tlotlo, morafe le one fela jalo o tshwanetse go tsaya boikarabelo jwa go tlhofofaletsa kgosi tiro ka go nna morafe o laolesegang.

Kgosi Mosadi  o tsweletse a rotloetsa kgosi Gabanamotse gore jaaka motho wa seemo sa gagwe, a ithute ditsamaiso le go ikokotela ka molao wa tsamaiso ya bogosi go mo thusa go tsaya ditshwetso tse di maleba ka dinako tshotlhe.

“Go dira dilo ka tsamaiso go ka go thusa thata go fokotsa go fetolwa ga ditshwetso tsa dikatlholo tsa gago, ka jaana tshaba ya gompieno ke e enang le dikitso mme e tlhoka go direlwa ka boammaruri go hema go gogagogana ka ditshwetso tsa go tlhoka kitso”, ga tlhalosa Kgosi Mosadi.

Kgosi Kgolo ya Bakwena Kgosi Kgari wa boraro, o ne a lebogela neelano ee nnileng teng ka morero wa go tshwarelela kgosi Gabanamotse go fitlha a rolelwa setilo sa gagwe.

“Letsatsi la go tlhoma kgosi le gorogile, le fa bangwe ba lona ba ne bale sebete se molangwana kwa ntlheng ka pelaelo ya gore lebaka la teng lene le le leejana kgosi a santse a le modirela puso”, ga tlhalosa kgosi Kgolo Kgari.

Mongwe wa batsadi ba baneng ba laya kgosi eleng mogolo wa ba bogosi jwa Bakwena Kgosi Keineetse Sebele o gwethile Kgosi Gabanamotse go tsweledisa kitso ya gagwe ya borutabana ka go ema nokeng go tlhabolola seemo sa thuto kwa Hatsalatladi.

A re o solofela fa nonofo e kgosi a e supileng mo tirong ya borutabana, e ka thusa thata go betla bana go amogela thuto ka leitlho lele pharologanyo go tlhaloganya se thuto e se rayang.

Rre Sebele o ne a solofetsa go ema nokeng sekolo se sebotlana sa Hatsalatladi ka go  abela bana ba ba fenyang ditlhatlhobo tsa makgaola kgang.

Kgosi Gabanamotse o ne a rotloetsa kgaolo ya Hatsalatladi go tsosolosa seemo sa temo ya kgaolo eo se se kileng sa bo sele kwa godimo.

O solofeditse go direla morafe wa gagwe ka tlhomamo ntle le go mpametsa, a supa fa tiro eo eka nna bonolo ka neelano le morafe.

Mokhanselara wa kgaolwana ya Hatsalatladi Rre Kolana Kolana le ene o rotloeditse tshwaraganano ya ga kgosi Gabanamotse le morafe go fitlhelela toro ya go tlhabololola kgaolo ya Hatsalatladi. Bokhutlo