23 Nov 2021

Banni ba Lehututu ba kopilwe go nna le mowa wa neelano mo dipaakanyong tsa go isa leina  la Kgosi yo o tlaa tlhatlhamang Kgosi Kebapatile Montshiwa, yo o tlhokafetseng ngogola.

Motshwarelela molaodi wa Kgalagadi, Rre Bigboy Mangwa o kopile jalo ka Labotlhano, jaaka a ne a rebola banni ba Lehututu go ka ya go ithuna dinta pele ga ba tsisa  leina la yo ba eletsang a ka tlhongwa kgosi.

Rre Mangwa o ne a kopa banni go inela ofisi ya gagwe diatla metsing, ka tiego ya go simolodisa thulaganyo ya peo ya kgosi.

A re seo, se bakilwe ke go tlhagoga ga COVID-19, mme se, sa pateletsa puso go tlhoma seemo sa tshoganetso se se neng se sa letle gore go ka kgobokanngwa morafe, kgang kgolo e le go babalela setshaba mo kanamong ya bolwetse.

Ka jalo, o ne a ba gwetlha go dirisa sebaka sa gompieno go netefatsa gore ba a kopana ba dumalana ka leina le ba tlaa le rolang Sedimonthole a le lesome le bosupa.

A re leina leo, le tlaa fetisediwa kwa go ba lephata la dikgaolo le tlhabololo matshelo go le tlhomamisa.

Rre Mangwa o ne a ba gakolola gore tiro eo, e tlhokana le go tshwarwa ka manontlhotlho, neelano le therisanyo.

A re go dira jalo, go ka kgontsha morafe go supa yo ba eletsang a ka neelwa maikarabelo a go o etelela pele.

O ne a tlatsa ka go re morafe o seka wa itebatsa ngwao le ditso tsa one, ka jalo, e nne  dingwe tsa dikaedi mo ditshekatshekong tsa one.

O ne gape a ba gakolola gore therisanyo e e lolameng, e tlaa ba thusa go fapoga dihawa.

Mo mafokong a gagwe a kamogelo, Kgosi Merapelo Tshweneyagae wa Hukuntsi, o ne a supa fa go le botlhokwa gore Lehututu a bewe kgosi ka jaana ditiro dingwe tsa motse di salela kwa morago.

O ne a supa fa diofisi tsa bogosi tsa Lokgwabe le Hukuntsi di ntse di tshwere ka natla go leka go thusa banni ba Lehututu, le ntswa a re go ne go sa lekana.

Kgosi Tshweneyagae, o ne a rotloetsa banni go ya go dira ka manontlhotlho mo dipuisanyong tsa bone.

A re neelano ya bone ke yone e tlaa thusang  go fefosa go  thijwa ga phatlha eo ya maemo a bogosi.

Fa ba akgela, mongwe wa banni Rre Cornelius Gaebolae, o ne a supa fa mo Lehututu, go na le merafe e le mebedi, wa Bangologa le Bashaga.

A re go tswa goo Lowe,  bogosi bo ntse bo le mo diatleng tsa Bangologa, ka jalo Bashaga le bone ba tshwanetse go fiwa sebaka.

Rre Keammona Mantle ene o ne a supa fa ba babaletswe ke go tlhoka kgosi ka jaana go emisitse ditshwetso tsa ditlhabololo tsa motse.

Rre Mantle o ne a kopa ba ntlo ya bogosi  go dirisana mo tirong eo ya go tlhophiwa ga leina la kgosi, a ba gakolola go remelela mo go dibeleng seriti sa bogosi jwa motse.

Fa a tswa la gagwe, Kgosi Bojosi Motshoge III go tswa kwa Tshane, o ne a tshwaela ka go re leina la moemedi le rerwa kwa ntlong ya bogosi.

A re le fa metse e na le merafe e e farologanyeng, seo  ga se rotloetse gore go ipagololelwe mogodu.

O ne a ba tlhagisa fa bogosi jwa motse mongwe le mongwe bo na le ditsamaiso, ka jalo, ga se botlhe ba ba tlaa neelwang bogosi, mme bangwe ba tlaa neelwa maemo a bogosana.

Kgosi Motshoge o ne gape a ba tsibosa fa go le mo maruding a banni go netefatsa gore ga ba senye lodula le tsamaisong e ba e fitlhelang ya bogosi mo motseng.

Mo mafokong a gagwe a malebo, mothusa modulasetilo wa khansele-potlana ya Hukuntsi, Rre Keorapetse Jane o ne a rotloetsa morafe go iphapha mo dikgannyeng tse di ka tsisang dipharologanyo tse a reng di ka dia go tlhongwa ga kgosi. BOKHUTLO