22 Nov 2021

Moruti Darius Baitse wa kereke ya Jacob’s Ladder o bolokilwe ka Matlhatso kwa Kanye, morago ga go lwala ka lobaka lo lokhutshwane.

Mopalamente wa Kanye Borwa Dr Lemogang Kwape yo gape e leng tsala, o kaile Moruti Baitse e le senatla sa temo le kgwebo, moeteledipele wa popota e bile e le lesole la tumelo.

Dr Kwape a re bontsi bo amule lorato, bonatla le boipelego mo go ene.

A re o tsamaile nae le Bishop Walebatla Radipitse mo loetong lwa botshelo, a ikaegile ka bone e le batsadi, go le monate le fa go le botlhoko.

Dr Kwape a re e ne e a re go le thata, a mmee fa pele ga Modimo ka thapelo a bo a mo fa ditemana gore a rudise mowa.

O tlhalositse fa a simolotse thomo e a mo go yone a ntse a na le bone, ba mo eme nokeng go tla go fitlha mo nakong ya gompieno.

Dr Kwape a re Rre Baitse e ne e le mogakolodi wa puso ka gangwe le gape o ne a mo gakolola a bo a mo roma gore a gakolole puso mo dikgannyeng tse di amang temo-thuo, botsogo, thitibalo ya setshaba le tsa tumelo ka e ne e le motsadi wa setshaba.

A re megopolo le boitemogelo tsa ga Moruti Baitse di ne di thusa go tlhabolola mananeo le tsamaiso ya puso.

O kaile fa Moruti Baitse a ne a itse go ingotla mo setshabeng, a rata lefatshe la gagabo mme e bile go utlwala fa a ne a seke a tlhoka go le rapelela a bo a rapelela le puso ka go kopa Modimo gore thitibalo ya mono, e e melediwang mathe ke mafatshe, e seka ya tswa Batswana ka ’phatlha tsa menwana.

Moruti Baitse o tshotswe ka 1934 kwa goora Mokonopi kwa Kanye.

O tlhakafetse kgwedi eno e le lesome le botlhano. BOKHUTLO