16 Nov 2021

Banni ba Ditshegwane ba rotloeditswe go tshwaraganela dikgang tsa kgokgontsho ka seo se ka thusa go lwantsha mmaba o.

Go tlhalosiwa fa se, se le botlhokwa ka kgokgontsho e ama mongwe le mongwe.

Mafoko a, a boletswe ke mogolwane go tswa ofising ya AIDS kwa Letlhakeng Rre Kennedy Dintwe, fa a ne a ntsha molaetsa kwa bokopanong jwa go ruta batho ka dikgang tsa kgokgontsho le kgethololo kwa Ditshegwane bosheng.

Rre Dintwe o supile gore fa ba ka kgona go fenya dikgang tse, batho ba metse e mengwe ba ka tla go tsaya malebela mo go bone. O tlhalositse fa bomme ba nna ba rwele bokete ka dinako tsotlhe.

Le fa go ntse jalo o akgotse borre ba malatsi a, a supa fa bontsi jwa bone ba tlhokomela bana ba bone. 

O tlhalositse fa borre ba maloba ba ne ba itatola bana gape ba ne ba sa ba tlhokomele. 

Rre Dintwe o kopile botlhe bao  ba ba kgokgontshiwang go ikatumetsa ditirelo tsa puso kana ba kope thuso kwa makalaneng a a ikemetseng.

Mogolwane are kgokgontsho ke botlhole jo bo jwelelelang go gaisa jwa noga, mme ka jalo go le botlhokwa gore e seka ya letlelelwa go jwelelela. 

Rre Dintwe o tlhalositse fa go latlhegelwa ke motho ka ntlha ya kgokgontsho go ama itsholelo ya lefatshe, ka jalo go le botlhokwa go e lwantsha mme ope a seka a re ga di mo ame.

O tlhalositse fa tiriso ya  ditagi e atile mo bananeng mme a kopa batsadi go kgalema.  Fa a leboga mogolwane go tswa kwa ofising ya ga molaodi  kwa Letlhakeng Mme Bianca Moswela, o ne a re mo malatsing a gompieno batho ba kgona go tsaya setshwantsho sa motshikhinyego fa motho a betswa go na le gore ba mo thuse, a bo a kopa mongwe le mongwe go ikatlhola a le nosi gore a se a se dirang se siame.

O rotloeditse Batswana go se tseye karolo go bolaya batho ba bangwe ka dipuo tsa bone le go ba tlhatlhoba ka matlho. 

BOKHUTLO