14 Nov 2021

Ba lelapa loora Mothale, kwa Sexaxa, sekgalanyana go tswa Maun, ba falotse ka bobi jwa segokgo morago ga gore ntlo ya bone e rathwe ke tladi e bo e kapa molelo mo bosigong jwa Laboraro.

Mongwe wa bone, Mme Bonolo Mothale o boletse mo potsolotsong gore tiragalo eo e ba garotse dipelo, e bile e ba tlogetse mo logoeleleng. 

O tlhalositse fa ntlo ga mmogo le dithoto tsotlhe, di akaretsa malao, dikobo, paka ya bana ya sekole le dibuka le dijo, di lorile.

Mme Mothale o boletse fa tiragalo eo e diragetse fa ene le mme mmaagwe le bana ba le bane, ba robetse. 

O tlhalositse fa pula ya dikgadima e ne ya tla ka mashetla, mme ka ponyo ya leitlho, go ne ga tsena lesedi le letona mo ntlong, mme la ngaparela mo leboteng le lebega jaaka legala. 

A re o ne a tlelwa ke letshogo, ka jalo a tsosa mmaagwe le bana gore ba iphalotse.

Mme Mothale a re e rile fela jaaka ba bula lebati, ba utlwa modumo o motona, o o ka reng sengwe se a thunya, mme fa ba tswela kwa ntle ntlo ke fa e setse e jajasela ka molelo.

O tlhalositse fa ka lesego go sena ope yo o gobetseng, a tlatsa ka go re baagisanyi ba ne ba leletsa ba lephata la ditimamolelo, mme ya re go gorogeng ba kgona go tima molelo oo.

Mme Mothale a re mapodisi le one a ne a goroga, mme a ba ragosetsa kwa kokelong kwa ba fetileng ba thusiwa, mme ya re letsatsi le le lateng ba gololwa.

Mokhanselara wa kgaolo, Rre Kobamelo Baikgodisi o rurifaditse tiragalo eo, a re e ba gakgamaditse, e bile e tsaletse lelapa leo matlhotlhapelo. 

A re ba itsesitse ba ofisi ya boipelego, ba ba tsweletseng ka go bona gore boora Mothale ba ka thusiwa jang. BOKHUTLO