10 Nov 2021

Mogolwane wa mapodisi a Molepolole le tikologo, Superintendent Benedict Matlho o kopile setshaba go nna kelotlhoko go hema dikgang tsa go itseela moloa mo diatleng mo maitekong a bone a go thusana le mapodisi go lwantsha borukutlhi.

E rile a bua mo tirong ya go simolodisa komiti ya ntebela-ke-go-lebele ya masimo a Mmatematema gaufi le Molepolole ka Matlhatso, Supt Matlho a gakolola fa go se ka fa molaong go dirisa dikgoka ke baithaopi mo tirong ya go thusa go lwantsha borukutlhi.

Supt Matlho a re e re ntswa tiro ya bone ya go lwantsha borukutlhi e ka seke e atlege ntle le thuso ya setshaba, molao ga o letle ka gope ditirgalo tsa go itseela molao mo diatleng, fa e se go tlhagisa mapodisi ka dikgang tse di tshwenyang morafe.

O ikuetse mo bathong ba kgaolwana ya Mmatematema go dira tiro ya go thusa mapodisi go lwantsha borukutlhi ka boikarabelo go itsa gore ba felele e le bone basekisiwa kgatlhanong le badira molato.

“Ke le kopa gore a maiteko a go lwantsha borukutlhi a dirwe ka boikarabelo re dirisa dithata tse di lekanetseng tse re di filweng ke molao,” ga gakolola Supt Matlho.

O ne a fa sekai ka tiragalo ya bosheng e mo go yone banna ba fera bobedi bangwe mo go bone e le  bakgweetsi ba ditaxi ba lebanweng ke molato wa polao ya mongwe wa ba belaelwa ba bogodu jwa koloi ya taxi bosheng mo Molepolole.

Banna bao go tlhalositswe fa ba ne ba le mo maitekong a go thusa mapodisi go tshwara badira molato mme ga nna le seemo se mo go sone mongwe wa babelaelwa ba bogodu jwa taxi a feletseng a tlhokafalela mo diatleng tsa setshaba.

E rile a ama baithaopi ba komiti ya Mmatematema ya ntebela-ke-go-lebele ka lefoko, mookamedi wa lekgotla la boithaopo la Hope Worldwide, Mme Theriso Motsemeng, a ba gakolola fa tiro ya boithopi e na le dikgwetlho tsa yone, ka jalo e tlhoka batho ba tsepame mo thomong e ba e setseng morago

“A re se kgobegeng marapo go sala morago thomo ya go thusa go babalela matshelo le dithoto tsa setshaba, tiro e e tlhokang bopelokgale le lerato,” ga kopa Mme Motsemeng.

Mongwe wa mapodidi a lekalana le le lwantshang tiriso botlhaswa ya ditagi, Seargent Kalako Fitlhanang o gakolotse setshaba ka botlhokwa jwa go thusa go upolola masula a kgolo ya tiriso ya ditagi botlhaswa mo tikologong e ba tshelang mo go yone.

Mokhanselara wa Kgaolwana ya Ratlhomelang, Rre Andrew Selwe o kopile gore dikomiti tsa boithaopo di tshwana ya ntebela-ke-go-lebele di lemogwe mo maitekong a di a dirang go thusa go lwantsha borukutlhi jwa methale e e farologanyeng jo bo tlhorontshang setshaba

Mokhanselara o ne a kopa bogogi jwa sepodidi go ela tlhoko tirisanyo e e bokowa ya bo monnaabone le setshaba fa ba begelwa ditragalo tsa borukutlhi, a supa fa tsibogo e e bonya le kamogelo e e bokowa di ka kgoba baithaopi marapo. Bokhutlo