09 Nov 2021

Dikereke di gwetlhilwe go tsaya karolo mo go dibeleng kagiso ya lefatshe leno.

Moeteledipele wa lekgotla la Organization of African Instituted Church (OAIC), Dr Mookami Motlhagodi o buile jaana fa a tlhoma lekalana la OAIC la Hukuntsi Sub-chapter ka mafelo a beke.

Dr Motlhagodi a re lefatshe le apesitswe kobo ka letshoba ke madubadube a tshwana le malwetse, botlhoka tsebe, lehuma, dipharologano tsa sepolotiki le tumelo.

Ka seo, o ne a gwetlha dikereke go tsaya maikarabelo ka go tshwaragana le puso le ba-na-le seabe ka kakaretso go lwantsha diemo tseo, gore lefatshe le robalelwe ke ditlhokwa.

Mo go tse dingwe, o buile a sa kgale mathe ka go thubega ga dikereke, a re gantsi dipharologanyo tse, di bakwa ke go itlhokomolosa melao metheo ya dikereke, le go dirisa maemo a boeteledipele ka fa go sa tshwanelang ka teng, mme a kopa tomagano go diragatsa thomo ya Modimo.

O ne a rotloetsa dikereke go nna sekao mo setshabeng ka go jwala peo ya popagano.

Dr Motlhagodi o ne gape a rotloetsa dikereke go tsosolosa mowa wa boithaopo mo malokong.

A re go ka ba thusa go ikokoanyetsa madi go ikagela matlo a kobamelo, go na le go leba kwa pusong ka dinako tsotlhe.

Fa a afa maikaelelo a letsatsi, Bishop Mabega Lesedi o ne a tlhalosa fa lekalana la Hukuntsi Sub-chapter e le lone le tlaa bong le lomaganya dikereke tsa semowa tsa kgaolo le lekgotla le le tona la OAIC.

Bishop Lesedi o ne a supa fa dikereke di lebanwe ke kgwetlho ya go tlhoka matlo a kobamelo, mme a kopa gore puso e ba thuse.

Bishop Thusego Kgosinaga ene o ne a tlhalosa ka ditso tsa OAIC, a supa fa e tlhamilwe ka 1978 kwa Cairo, mme ya phatlalala le lefatshe ka bophara, maikaelelo magolo a lone e le go kopanya dikereke tsa semowa go dira ka bongwefela jwa pelo mo go tsa sedumedi.

A re mo borwa jwa Afrika le simolotswe semmuso ka 1985, mme moeteledipele a tlhophiwa mo Botswana.

Fa a ntsha lefoko la kgothatso mo malokong a Hukuntsi Sub-hapter, Bishop Phillimon Modise o ne a re ntswa ba lebanwe ke namane e tona ya tiro ya go kopanya dikereke, ba ka kgona fela fa ba ka nosetsa mowa wa popagano mo malokong.

Mo mafokong a gagwe a kamogelo, Kgosi Merapelo Tshweneyagae o ne a tlhalosa fa go tswa goo Lowe, kereke e na le seabe mo go tlhabololeng matshelo a setshaba.

A re dikereke di dirile go le gontsi mo go simolodiseng thuto le go ntsha ditirelo tsa botsogo mo lefatsheng leno.

Ka jalo, Kgosi Tshweneyagae o ne a gwetlha dikereke gore ntswa di le mo leshekereng la madi, di seka tsa ipona tsapa ka go tswelela di dira molemo mo setshabeng.

Mo mafokong a malebogo, modulasetilo wa khansele-potlana ya Hukuntsi, Mme Kebaneilwe Mnesetse, o ne a rotloetsa dikereke go nna seopo sengwe, go rudisa mowa wa sedumedi le go aga setshaba se se bopaganeng go ya bosakhutleng. BOKHUTLO