04 Nov 2021

Tona wa botsogo le boitekanelo, Dr Edwin Dikoloti a re lephata la gagwe le mo thulaganyong ya go baakanya dikokelo tsa Letsholathebe Memorial kwa Maun, Scottish Livingstone kwa Molepolole le Sekgoma Memorial mo Serowe.

Rre Dikoloti o buile se mo phuthegong ya kgotla e e neng e buisiwa ke Tautona Dr Mokgweetsi Masisi mo Serowe bosheng. 

O tlhalositse fa dikokelo tseo di tlhoka go baakakanngwa ka jaana di  tsenya metsi mo marulelong.

O ne a tlhalosetsa banni fa go ntse go na le rakonteraka mongwe yo o neng a dira dipaakanyo kwa kokelong ya Sekgoma Memorial mme a fetsa ka kgwedi ya Motsheganong ka jalo a seka a digela tiro ya gagwe mme o tshwanetse go e feleletsa.

Ka jalo, Rre Dikoloti o ne a ikuela mo go baeteledipele ba motse go nna le seabe ka nako tsotlhe fa go nna le ditlhabololo mo motseng wa bone.  

A re ba tshwanetse ba rurifatse gore madi a setshaba a dirisiwa sentle. A re tshenyetso setshaba e tshwanetse ya lwantshiwa ka fa ditiro tsa puso di sa wele sentle setshaba se ka  babalelwa.

Fa a tsibogela kopo ya go oketsa dikokelo tse di tlaa dirang letsatsi lotlhe (24 hrs), o ne a supa fa kokelo e kgologolo ya Sekgoma Memorial e tlaa nna nngwe ya tse di tlaa dirang letsatsi lotlhe.

Mo go tse dingwe, Rre Dikoloti o ne a itsise banni ba Serowe fa lefatshe le setse le amogetse mekento ya COVID-19 e le 1 912 844 mme mekento eo e ne ya goroga ka bontsi mo kgweding ya Phalane.

A re puso e ne ya ipaya pele gore e nne puso e e tsamaisiwang ke itsholelo e e ikaegileng ka dikitso. 

A re puso e na le thulaganyo le dikompone dingwe gore lefatshe le seka la reka melemo fela mme le nne bontlha bongwe jwa dipatlisiso tsa melemo ya COVID-19.

Rre Dikoloti o tsweletse a re thulaganyo ya go kentelwa COVID-19 e tshwanetse ya simolole kwa malwapeng a supa fa tshireletsego ya motho e le mo go ba a tshelang le bone. 

A re fa motho a ikenta o sireletsa le yo a nnang le ene kwa lwapeng. BOKHUTLO