05 Sep 2021

Baoki ba le bararo ba mo diatleng tsa mapodisi ka dipelaelo tsa gore ba itseetse di dirisiwa tsa botsogo tse di tlhatlhobelang batho bolwetse jwa COVID -19.

Mo potsolotsong le lekalana la dikgang la BOPA ka Labone mookamela mapodisi a Moshupa Superintendent David Ramoseki a re bosheng mapodisi ba ne ba utlwa ka podi ya tsela fa go na le di dirisiwa dingwe tsa botsogo tse di nyeletseng.

A re e ne ya re go tsibogela kgang e, ba tshwara banna ba le bararo ba dingwaga tse di fa gare ga masome a mabedi le boferabongwe le masome a mararo ba ba direlang kwa Gaborone, Moshupa le Kgomokasitwa, a tlatsa ka gore go kgonnwe go bonwa mabokoso a le masome a mabedi a didirisiwa tsa go nna jalo.

A re ditlhotlhomiso di santse di tsweletse ka jaana go lebega fa tse dingwe di setse di hetiseditswe golo gongwe, a re ba sepodisi ba letile go utlwa ba botsogo gore tota go nyeletse mabokoso a le kae.

Supt.Ramoseki a re banna ba baka lebisiwa molato wa go utswa motho e le modirelapuso mme ba ka o atlholelwang dingwaga tse di sa feteng bosupa fa a ba ka bonwa molato.

Mo go tse dingwe a re mapodisi a tshwenngwa ke kepo ya motlhaba e e seng ka fa molaong mo kgaolong ya sepodisi ya Moshupa, a supa fa ba nnile le dikgang di le pedi kwa masimong a Madutlela ka Mosupologo kwa ba fitlhetseng banna ba le babedi ka diteraka ba epa motlhaba.

A re mapodisi ba ne ba ba kopa diteseletso tsa go epa motlhaba mme ba di tlhoka ka jalo ba tshegetsa diteraka tseo ka bobedi, a re enngwe e ne e tswa ko Gaborone fa enngwe e ne e tswa ko Kanye.

 A re diteraka tseo di emetse go tlhatlhobiwa go bona gore a di itekanetse go ka tsamaya mo tseleng. 

 A re borre bao yo mongwe o dingwaga di masome a mararo le boraro fa yo mongwe ene a le dingwaga tse di masome a mane. Bokhutlo