29 Aug 2021

Kgaolo potlana ya Palapye e tsweletse ka go gatisa dipalo tse di kwa godimo tsa bolwetsi jwa mabele.

Modulasitilo wa khansele potlana ya Palapye, Mme Khumoyame Lekoko o tlhalositse kwa phuthegong ya khansele bosheng gore kgolo ya bolwetsi e ka tswa e bakiwa ke tlhaelo ya kitso mo setshabeng le go tlhoka go dirisa matlwana a boitiketso kwa mahudisong.

Mme Lekoko o rotloetsa barui go kenta leruo jaaka ba lephata la matlhoko a leruo ba rotloetsa gore go dirwe.

A re mokento o thusa go thibela bolwetsi ka gore fa bo setse bo tsene, go turu go bo alafa gape moento o thibela malwetsi a a tshelwanwang ke diphologolo le a di ka a fitisetsang kwa bathong.

A re letsholo la go kentela kwatsi (Anthrax) le Quarter Evil le tsweletse, a tlhalosa fa barui ba tsaya melemo kwa lephateng la matlhoko a leruo mme ba dirise bakenti ba ba ikemetseng go ba thusa .

Mme Lekoko a re le fa barui ba le bonya go dirisa lenaneo le, sekgoreletsi segolo ke  tlhaelo ya melemo. A re dikgomo di le 15 000 mo go tse 152 00 di filwe kwatsi fa tse 8 000 mo go tse 50 700 di filwe Quarter Evil .

O tlhalositse fa molafo o kentelwa ngwaga otlhe ke badiri ba lephata la matlhoko a leruo.

A re ba kgonne go kenta dintsa di le 125 mo go tse 6 000 le dikatse di le thataro mo go tse 900, a supa fa lenaneo le isitswe tlase ke kgwetlho ya COVID-19. BOPA