12 Aug 2021

 Tonki ke seruiwa se bontsi jwa batho  ba se dirisang go lema le go nna sepalamo.

Le fa go ntse jalo, bangwe ba kgona go e tlhaba ba bo ba a ja nama ya yone fa bangwe ba e bifela ba supa fa e na le monko o ba sa o rateng. 

Ba bangwe bone ba dumela fa e sa tshwanela go jewa ka e bogisega ka go betswa thata fa e dirisiwa e le sepalamo e bile e kgona go tsamaisiwa sekgele se seleele. 

Rre Tshepang Joshua wa dingwaga tse masome a mabedi le borataro ke mongwe wa banana ba Serowe ba ba gwebang ka nama ya tonki e bile a tswa bonyennyaneng a itse fa e jewa. 

O na le bareki ba ba farologaneng jaaka bakgweetsi ba dipalamo tsa setshaba, babereki ka go farologana le banni ba Serowe.

Fa a bua mo potsolosong, Rre Joshua a re go simolola kgwebo ya gagwe ya go rekisa nama ya tonki go ne ga gakgamatsa ba le bantsi ka go ne ga diragala ka ponyo ya leitlho e bile a sa go akanyetsa.

E re ka e le monana wa dikgwebo tse di farologaneng, e ne ya re nako nngwe a ntse a dira mo kgwebong ya gagwe ya go tsenya maotwana mo dikoloing, tonki nngwe ya thulwa ke koloi gaufi le fa a direlang teng.

A re beng ba tonki eo ba ne ba batla go e ntsha mo tseleng go ya go e latlha ka ba sa je nama ya yone mme a felela a e reka mo go bone ka ene a ne a itse gore e a jewa. 

A re o ne a e apaya mme a rekisetsa nama ya yone gaufi le fa madirelong a gagwe mme a gakgamala a bona batho ba tla ka mmetela go tla go reka.

A re kgwebo ya gagwe e ne ya simolola gone foo ka a ne a lemogile fa nama ya tonki e ratiwa fela thata, mme o ne a kopa Rre Kabo Motsebe gore a mo thuse go rekisa nama fa ene a santse a le mo dikgwebong tse dingwe. 

Rre Joshua o ne a tlhalosa fa a lemogile fa nama ya tonki e ratiwa kwa Serowe fela jaaka ya kgomo. Gantsi o apaya seswaa a bo a apaya bogobe jwa mabele kana phaletshe.

A re o rekisa bogobe le nama P10 mme ba ba rekang mo go ene ba itumela fela thata ka ditlhwatlhwa tsa gagwe e le tse ba di kgonang. A re o kgona go rekisa nama fela mme le yone e nna P10.   

A re fa a tlhabile tonki, o e rekisa fela mo letsatsing le le lengwe kana a le mabedi e bo e fela. 

A re nama ya tonki e mo tsenyetsa madi aa botoka ka o ne a felela a reka motshameko wa snooker a o baya go bapa le dikgwebo tsa gagwe mme le one o dira sentle.

O supile fa nama ya tonki e le nngwe ya dinama tse e kabong batho botlhe ba itlwaetsa go di ja ka e sa tshabelelwe ke malwetse a mantsi. 

A re bontsi jwa bareki ba nama ya tonki ba a mo galaletsa ka ba supa fa a na le letsogo le lentle la go tlhaba tonki mme ba supa fa e le monate. 

A re o dirisanya le barui ba ditonki kwa Serowe le kwa metseng e e gautshwane mme mo dinakong tse dingwe o kgona go felela a reka kgakajana jaaka kwa Serule fa a utlwaletse tse di tlhwatlhwa e e botoka teng. 

A re bontsi jwa barui ba ditonki mo Serowe ba di rekisa P1 000 mme kwa mafelong a mangwe o kgona go e reka P600.

Rre Joshua a re le ntswa a tsweletse le kgwebo ya gagwe, o na le dikgwetlho jaaka letlhoko la koloi ka a patelesega go batla ba ba ka mo thusang go tsaya tonki kwa a tla a bong a e rekile teng.

A re o eletsa gore tonki e tsewe tsia mo lefatsheng leno ebile go nne le madirelo a yone gore Batswana ba kgone go itshetsa ka nama ya yone fela jaaka diruiwa tse dingwe ka bontsi jwa bone ba na le ditonki bogolo jang kwa metseng e mennye.

 O tlhalositse fa Batswana bangwe ba santse ba sa batle gotlhelele gore nama ya tonki e ka amana le fa go segelwang ya kgomo teng mme fa go ka nna le fa e tlhabelwang teng le gone fa e rekisediwang teng sentle go ka tswela Batswana mosola. Bokhutlo