04 Aug 2021

Banni ba Nlapkhwane kwa kgaolong ya Bokone Botlhaba ba simolodisitse lenaneo la go rema ditlhare mo ditseleng tse di yang kwa masimo go baakanyetsa paka e e tlang ya temo.

Mo potsolotsong, Kgosi Mukani Mudongo, o tlhalositse fa banni ba dikgotlana tsa Phandu, Nyoke le Thonongola ba ithaopile go baakanya ditsela go tlhofofatsa metsamao ya batho le dikoloi.

A re ba lemogile fa di dirisiwa dingwe tsa balemisi di le ditona, ka jalo go nna dingalo gore di goroge kwa masimo mangwe, a ditsela tsa one di leng ditshesane.

O lebogetse morafe go tsibogela go rema ditlhare le go thiba mesele, a tlhalosa fa ditlhare di godile thata monongwaga ka ntlha ya pula e ntsi ngogola.

A re go le gantsi batho ba emela gore puso e tswe ka mananeo a go thusa go rarabolola dikgwetlho, ka jalo a bua fa go itumedisa go bona banni ba tshegeditse mowa wa boithaopi.

Kgosi o tsweletse ka go supa fa a eletsa gore mowa o wa boithaopo o atlege le go goroga kwa dikgotlaneng tse tharo tse di setseng.

O boletse fa batho ba ne ba lemile mo go tlhatswang pelo ngogola, ebile ba robile thobo e nametsang, segolo thata lebelebele, a bolela fa balemi ba ba botlana ka bontsi ba kgonne go roba dikgetsi di le masome a mabedi tsa lebelebele.

Kgosi Mudongo a re balemi ka bontsi ba dikile ba jesa malwapa a bone thobo e tswang kwa masimo a bone, go na le go reka mo baleming ba bangwe jaaka e le tlwaelo.

Le fa go ntse jalo, Kgosi a re o tshwengwa ke go sa tlhokomelwa ga leruo mo Nlapkhwane, mo le felelang le senya mo masimong a batho, a tlhalosa fa se se baka dikgotlhang mo motseng. Bokhutlo