04 Aug 2021

Tona wa Botsogo le Boitekanelo, Dr Edwin Dikoloti, a re puso e na le thulaganyo ee tsepameng go bona gore mekento ya COVID-19 e goroga mo nakong ee sa fediseng pelo.

Fa a lekodisa ka theko le go goroga ga melemo mo Gaborone ka Laboraro, Dr Dikoloti o boletse fa puso e  tlhaloganya gore Batswana ba letile mekento

A re le fa go ntse jalo, Botswana o beeleditse theko ya melemo mo masakaneng a mafatshe a farologaneng jaaka Covax, a tlatsa ka gore ba na le ditumalano dingwe tse di kgethegileng le mafatshe gore ba ba abele melemo.

O tlhalositse seo ke sesupo sa gore puso e tshwenyegile thata ka fa Batswana ba tsenwang ke mogare wa corona ka teng, mme e bile ba tlhoka mekento gore o ba tlhofofaletse bokete jwa bolwetse.

Dr Dikoloti o ne a tlhalosa fa lefatshe  le dira bojotlhe go batla melemo, mme a re madiadia mangwe ke one a ba ememg pele a tlatsa ka gore puso ga ya iketla,  a ba a rurafatsa  gore mo nakong e sa fediseng pelo, mekento e tlaa goroga. 

Dr Dikoloti a re tiego e tsalwa gape ke gore mafatshe aa dirang melemo a lebelela seemo sa mogare mo mafatsheng a bone pele, mme fa se sa ba ema sentle ba dirisa melemo ya bone, ka moo mafatshe a solofeditsweng a sale mo legoeleleng.

Dr Dikoloti o ne gape a re mahatshe aa dirang melemo, a aba melemo a lebeletse le bokete jwa dintsho tsa mafatshe, ka jalo a re ke ka moo mafatshe a mangwe a bonang melemo ka gore palo ya baswi ba bone e kwa godimo.

Le fa go ntse jalo, tona o tlhalositse fa melemo ka bonsti e solofetswe go goroga mo kgweding eno, a supa fa ba emetse molemo wa Astrazeneca o le 38 400 mo bofelong jwa beke ka Sontaga, gore batho ba ba neng ba ise ba tseye lemao la bobedi ba thusiwe.

A re Covax e solofeditse melemo ya sDinovac e le 16 000 fa Johnson & Johnson e ba solofeditse melemo e le 93 000 kgwedi eno. Bokhutlo