28 Jul 2021

 Mmakaseterata yo mogolwane Rre Mmoloki Sibanda o atlholetse Maithamako Koomogetswe wa dingwaga tse 50 wa kgotla ya Boronyane mo Maun kgolegelo ya dingwaga tse 20, morago ga go mmona molato wa petelelo mo mabakeng a le mabedi. 

E rile a ntsha katlholo ka Laboraro Rre Sibanda a bolela fa mosekisiwa a tshwanetswe ke katlholo e e tla mo kgaphang mo bathong. 

O ne a atlholela mosekisiwa kgolegelo ya dingwaga di le lesome mo molatong mongwe le mongwe, mme a tlhalosa fa a tlaa kibela melato eo ka go tlhomagana ga yone, go simolola kgwedi ya Lwetse e tlhola malatsi a le 18, ka 2018 fa a ne a tshwarwa. 

Mmakasetarata o tlhalositse fa lekgotla le gorogile mo katlholong eo ka jaana go ne go sena mabaka ape a a utlwalang a gore mosekisiwa a bo a dirile melato eo. 

A re Koomogetse, ga a ka a supa boikotlhao fa tsheko e ntse e tsweletse, mme ebile o ne a gana le go ipobola. Mosekisiwa o thubeditse basadi ba babedi bao tsatsi le penne. 

Mmakaseterata Sibanda a re Koomogetse o ne a betelela mosadi wa ntlha mo sekgweng, fa yo mongwe a mo thubeditse a le mo tseleng a ya tirong. 

O ne a tshosetsa basadi bao ka gore o tlaa ba tlhaba ka thipa fa ba kabo ba leka go kua. 

“Mosekisiwa ke serukutlhi se se borai, se se ka nnang sa dira molato fa se ka bona sebaka,” a rialo. 

O tlhalositse fa petelelo e le molato o o maswe thata, mme e aname mo kgaolong ya Bokone-bophirima, ka jalo go le botlhokwa go sireletsa batswa-setlhabelo. 

Mo molatong wa ntlha, mosekisiwa o ne a thubetsa mongongoregi kgwedi ya Phukwi e le 31 ka 2018 kwa kgotleng ya Shashe kwa Maun. 

Mo molatong wa bobedi mosekisiwa o ne a thubetsa mongongoregi kgwedi ya Phatwe e le 23, e ntse e le ka 2018 kwa kgotleng ya Sedie kwa Maun. 

Mmakaseterata Sibanda a re Koomogetse, yo o setseng a kibela melato e mengwe ya thubetso, o tlaa simolola go kibela dingwaga tse 20 tsa melato e mebedi e, fela fa a sena go wetsa katlholo ya wa pele. 

E ne e rile ngogola ka Lwetse a le 20, Mmakaseterata-mogolo Thebeetsile Molalu a atlholela Koomogetse kgolegelo ya dingwaga tse 15 morago ga go mmona molato mo mabakeng a le mabedi a petelelo. 

BOKHUTLO