08 Jul 2021

Mapodisi a tshwaraganye le namane e tona ya tiro go lwantsha borukutlhi jo bo tsweletseng ka go oketsega le go iphetola mebala.

Ramapodisi wa pele, Rre Norman Moleboge a re ka jalo go le botlhokwa go tlhoma makalana a mangwe a a tlaa thusang go itepatepanya le seemo se.

O buile jalo ka Labone kwa bokopanong jwa lekgotla la Twantsho Tshenyetso Setshaba le go Gopela Itsholelo mo Gaborone.

Rre Moleboge a re lekgotla la DCEC, ke lengwe la makalana a a neng simolodisiwa go imolola sepodisi tiro.

Bokopano jo, ke matlhagola tsela a go baakanyetsa go keteka letsatsi la go ipelela go lwantsha tshenyetso setshaba mo Afrika (African Anti-Corruption) le le tlaa tshwarelwang kwa Jwaneng, kgwedi eno e le lesome le bongwe, le go sekaseka ka fa lekgotla le tsweletseng mo go direng thomo ya lone.

Rre Moleboge a  re makalana a twantsho borukuthi a a tsetsweng ke sepodisi a mmalwa, a tlatsa ka go re seo, se dirilwe ke maiteko a go nonothsa methale ya go tsibogela borukutlhi morago ga go lemoga gore mapodisi a ka seke a kgone a le nosi. “Lebaka le, ke lone le le dirileng gore lekalana la DCEC le simolodisiwe,” ga tlhalosa Rre Moleboge.

Fa a tswa la gagwe, mookamedi wa DCEC, Rre Tymon Katlholo a re nngwe ya ditiragalo tse di neng tsa gwetlha go tlhangwa ga lekalana la DCEC ke kotsi ya koloi e e neng ya diragala mo tseleng ya Lobatse e ama mookamedi wa lekalana lengwe la puso, mme ya re go tsweletswe ka dithotlhomiso kwa lefelong la tiragalo ga fitlhelwa (P8 000), mme seemo seo sa gakgamatsa thata gore madi a a akalo a ne a tswa kae.

A re e ne ya re ba latedisa kwa yo o neng a amegile mo kotsing a berekelang teng, batlhotlhomisi ba fitlhela madi a a fetang P200 000 mo sebolokelong sa madi, ka jalo seemo seo sa lemotsha fa go na le tshenyetso setshaba.

Rre Katlholo a re ditlhotlhomiso di ne tsa senola  fa go na le tshenyetso setshaba, bogolo jang e e amanang le tsa madi, ka jalo e tlhokana le botsipa bongwe jo bo tseneletseng, ka jalo ga tlhangwa DCEC.

Moeteledipele wa pele wa lekgotla le, Mme Rose Seretse a re go ne go se bonolo fa a tsaya marapo mo go Rre Katlholo, ka gore lekalana la DCEC le ne le tlhaelelwa ke bodiredi le ntswa seemo sa tshenyetso setshaba sone se tsweletse ka go kekela.

Mme Seretse a re  o ne a tshwanelwa ke go kopa go okelediwa  bodiredi le fa go ne go se bonolo ka jaana maphata ka bontsi a ne a aperwe ke seemo sa go tlhaelelwa ke bodiredi.

A re go ne go se bonolo go etelela pele lekgotla le, ka gore setshaba se ne se nna se ba kgala se re ba tshwara ditlhapi tse dipotlanafela, ba tlogela bonkwenkgoga ba tshenyetso setshaba.

Le fa go ntse jalo, Mme Seretse a re setshaba se tshwanetse sa tlhaloganya gore ope yo o amanngwang le tshenyetso setshaba o lebanwe ke kwatlhao go sa kgathalesege gore e bogolo bo kae.

Mme Seretse a re lekalana le ne la tswa ka megopolo e le mmalwa jaaka go tlhoma dikomiti tse di itebagantseng le go thibela tshenyetso setshaba kwa maphateng a a farologanyeng a puso.

Rre Bruno Paledi yo le ene e leng mookamedi wa pele wa lekalana le, o tlhalositse gore o tsenye mo ditlhakong tsa go okamela lekalana le ka nako e dikgang tsa tshenyetso setshaba di neng di keketse, ka jalo go tlhoka gore ba tsholetse Mosepele go di lwantsha.

Rre Paledi a re se a se lemogileng mo nakong e khutshwane e a neng a okametse lekalana le, ke gore batho ba ba inaakantseng le tshenyo setshaba ke batho ba ba matlhale a a tseneletseng a a batlang bodiredi jo bo rutetsweng tiro gore ba kgone go tlhotlhomisa tshenyetso setshaba ka botlalo.

O gateletse gore bodiredi bo tshwanetse go nna bo rutuntshiwa go itapatepanya le seemo sa gompieno se se fetogang letsatsi le letsatsi.BOKHUTLO